Arte di GN na Aruba, Apeldoorn y Deventer!

 

 

Na Aruba, for di 2016 tin preparacion pa presenta un buki titula ‘Maternidad’, den 4 lenga mas papia na Aruba, cu pinturanan di Gustave Nouel (GN).
E modelo/actris Arubiano, Zuleika Coffie, a pose pa tur e pinturanan den e buki Maternidad y a comparti su pensamento/experencianan durante su maternidad.

Tambe un exposicion di e pinturanan, performances y workshops di Nouel na Aruba, ta parti di e proyecto di Arte, tentativamente na mei 2017, of e fecha cu Dios ta permiti.
Apoyo, sin interes personal, di sr. Turi de Veer, pa yuda realisa e proyecto di Arte aki na Aruba ta algo ehemplar pa nos mundo di Arte local.

Mientrastanto e artista Arubiano GN ta hopi activo na Apeldoorn y Deventer.
Na galeria PS20 (kunstcollectief), dia 2 di april, Nouel lo crea caricaturanan y ‘quick-sketch’ estilo ‘street-art’, durante e ‘Kunstroute’ di Apeldoorn.

Gustave Nouel oficialmente t’e specialista di portret p’e colectivo di artista PS20 na Apeldoorn.
Na Apeldoorn Nouel a ser invita p’e comité di Arte di ‘Grote Kerk’ pa expone su serie inspira p’e Reynan y Stadhoudernan di Cas di Oranje, den tur dos sala di exposicion di nan edificio Irene na Koninginnelaan 3/5, Apeldoorn di 5 te 17 di april 2017.
E conocido Art Café ‘Sam Sam’ di Apeldoorn, tambe a invita e artista Arubiano Gustave Nouel pa duna un ‘live performance’ y ‘masterclass’ dia 22 di april, cu Talens como sponsor.

 

Na Deventer Gustave ta pinta regularmente caricatura of ‘quick-sketch’ di publico n’e centro ‘De Ontmoeting’ (tambe cu afspraak).

Den pasado Nouel a expone y hasta a yega di duna workshops na ‘De Ontmoeting’, pa comparti su tecnica universal.
Hunto cu centro di bario ‘Huis van de Wijk’ na Rivierenwijk, Gustave Nouel ta preparando un serie nobo di ‘les di pinta portret’ pa tur nivel, cu lo cumisa na mei, ora Nouel ta na Hulanda.
Artistanan cu kier focus mas riba tecnica di pinta portret, tin e oportunidad pa inscribi nan mes pa ‘masterclass di pinta portret’ den atelier di Nouel na ‘De Plataan’ (Centrum Beeldende Kunst), Deventer.

Nouel su Arte ta saca cara di Aruba internacionalmente y ta crea un brug artistico, entre Hulanda y e parti di nos Reino den Caribe. Mas informacion via mail: gn140154@gmail.com

 

 

Top