Aruba a adopta e proceso di SDGnan y ta crea un momento cu participacion di tur sector den comunidad

Diamars siman pasa a tuma lugar na Aruba e workshop di e Framework di Metanan pa Desaroyo Sostenibel (SDG’s) di Nacionnan Uni.

E evento a reuni tur stakeholder for di sector publico y priva como tambe for di comunidad y tabata conduci pa Richard Blewitt den sala di Crystal Theatre.

E proposito di e workshop tabata pa comparti e avancenan di e SDGnan na nivel di Caribe y global, pero principalmente na Aruba mes.

Tambe a discuti con pa haya mas hende involucra den e proceso dinamico pa percura cu e SDGnan ta central den e desaroyo nacional di Aruba y cu nos pais por ta un modelo riba base di su ‘best practices’ pa otro Small Island Developing States (SIDS).

 

Richard Blewitt ta coordinador di Nacionnan Uni y representante di e organisacion mundial pa Aruba, Corsou, St. Maarten, Surinam y Trinidad & Tobago. El a splica cu loke ta mas interesante e importante di e SDG’s ta cu e ta un agenda universal consistiendo di 17 punto cu tur pais rond mundo a aproba y ta trahando riba nan.

Hulanda, p.e., ta avansando den su trayecto, mescos cu Alemania.

“Mi ta kere cu loke e ta haci ta inspira accion nacional pa uni desaroyonan economico cu desaroyonan ambiente y ataca pobresa sigurando cu tin un maneho holistico pa percura cu en berdad nos tin un futuro sostenibel pa nos pais,” asina Richard Blewitt a indica.

 

Pa loke ta trata Aruba, nos isla a adopta e proceso, cual ta e parti mas importante.

Di acuerdo cu Richard Blewitt: “E mester ta dirigi nacionalmente y cu ta sinti localmente; di otro forma, e ta djis otro framework cu bo ta haci djis pa yena e rekisitonan di Nacionnan.”

Dies luna pasa a cuminsa na Aruba cu un reunion cu Conseho di Minister y representantenan di e United Nations Development Programme, pero tambe cu funcionarionan publico.

Blewitt ta bisa cu a wak un entusiasmo e tempo ey y for di esey a crea un momentum formando gruponan di trabou cu ta enfoca riba data y den impulsa e SDGnan, algo cu ta fantastico. Agencianan manera ATA tambe ta forma parti di e esfuerzonan.

 

“Na final di e dia bo kier un Aruba pa bo yiu y bo nietonan; e ta un lugar cu nos mester preserva riba termino largo y e SDGnan por inspira esey.

Boso tin un Prome Minister cu ta hopi bon posiciona pa yuda presenta e mensahe ey cu su Gobierno,” Richard Blewitt a comenta.

P’esnan cu no conoce kico t’e Sustainable Development Goals, por bishita websitenan manera www.sustainabledevelopment.un.org of www.pmoaruba.com.

Aki por haya un descripcion di cada un di nan, pakico nan ta importante, con paisnan ta uzando nan, etc.

Blewitt ta pidi e ciudadanonan pa pidi nan lidernan pa mustra e conexion entre e SDGnan den cada paso cu nan tuma.

“E ta un logro p’e comunidad, e ta un logro p’e turista. Percura cu, como comunidad, bo ta vocifera bo opinion riba e prioridadnan pa Aruba y uza e SDGnan como un oportunidad pa dialogo riba e construccion di un miho Aruba, di un Aruba mas feliz.”

 

 

 

Top