Aruba a gana e Caribbean Shorts Award na CIFFR

E short film titula “E Yobida di Ayera” a gana e Caribbean Shorts Award 2017 durante e Curacao International Film Festival Rotterdam cu a tuma lugar di 5 pa 9 di april 2017.

Aruba a sobresali den un competencia fuerte cu filmnan di e. o. Cuba, Mexico y Republica Dominicana. E hurado tabata consisti di Mirjam Klootwijk (IFFR program manager), filmmaker Nathalie Alonso Casale, y Alex Santiago Perez (Yellow Robin Award winner 2015 cu Las Vacas con gafas).

 

Nan a duna e siguiente comentario: “Yesterday’s Rain is able to move us on an existential level, it stands out in its attempt to remain humanistic, humble, and honest while at the same time depicting very courageously the first signs of a painful fate.”

Skirbi y dirigi pa Armand Simon, e film ta trata un tema sensitivo y ta describi un momento crucial den bida di e hoben Monica, unda e ta expresa su amor pa su amiga. Actornan principal ta Kyara van Romondt y Sabrina Tromp. Otro actornan ta Lola van Dijk y Darryl de Vries. Tur ta studiante di actuacion na Da Vinci Academy.

Na 2016, e CIFFR a sera un acuerdo cu 6 festival di cine den region Caribense y tin como meta pa intercambia experticio y experiencia y pa desaroya talento riba e tereno di cine.

Despues di a gana e competencia local y consecuentemente a sali ganador di e competencia internacional, “E Yobida di Ayera” awor tin e honor di representa Aruba den festivalnan di cine na Cuba, Republica Dominicana, Guadeloupe, Martinique, Mexico y Trinidad & Tobago.

Top