Aruba Airlines a anuncia structura nobo; Awor cu a yega na un areglo cu su fundador Onno de Swart

Awe nos a recibi un participacion di parti di Aruba Airlines cu ta bisa cu nan ta cuminsa cu un structura nobo, awor cu nan a yega na un acuerdo final cu e fundador di e compania Onno de Swart.

Papiando cu Onno de Swart, el a duna di conoce, cu e no kier sigui cu mas caso den Corte, maske e sa cu e ta sigui haya razon, pero no kier forma un obstaculo pa cu adelanto di e compania cu e mes a funda. Pesey, despues di deliberacion, a yega na un acuerdo cu e ta prefera di no divulga.

 

T’asina cu Aruba Airlines a wordo estableci na 2006 dor di Onno de Swart. Como parti di Aruba Airlines su desaroyo, un acuerdo di benta y compra a wordo sera na april 2012 entre sr. de Swart y Seastar Holding N.V.

E intencion di e acuerdo aki tabata pa mas a dilanti capitaliza e compania, cu e intencion di expande e operacion pa por incorpora un Airbus A-320 riba e specificacion nan operacional.

 

E proyecto aki a wordo realiza exitosamente, Aruba Airlines tin awe 3 A-320 den operacion.

Na 2016 algun desacuerdo a surgi entre e partidonan cu a resulta den diferente caso den Corte.

Pa por salvaguardia e existencia di e compana, partidonan a dicidi pa yega na un acuerdo mutuo y reparti nan bienes.

 

Onno de Swart no ta fungiendo mas como un miembro beneficiario di e compania y no ta carga ningun responsablidad como tal. Onno de Swart ta desea e compania hopi exito den futuro.

Riba nos pregunta, si e por sa si Aruba Airlines lo cumpra avionnan mas chiquito, pa sigui cu nan buelonan interinsular, awor cu InselAir a cancela varios di su buelonan regional, de Swart a referi nos na Aruba Airlines su ehecutivonan.

 

Lamentablemente den e comunicado di Aruba Airlines, papiando di un structuracion nobo, no ta ser haci mencion di ningun di e ehecutivonan p.e. kende ta nan CEO na Aruba.

 

 

 

 

Leave a Reply

Top