Aruba Airlines tambe tin su problemanan financiero Gerencia ta den proceso di reorganisacion Pero lo no tolera pa reduci salario cu 50%

No ta solamente InselAir, pero tambe Aruba Airlines ta pasando den su problema financiero. Un di e autornan di esaki ta Venezuela tambe, cu no kier paga loke e debe e.o. na Aruba Airlines, cu te awe ta sigui bula pa Venezuela.

Tabata na 2015 cu Aruba Airlines a haya su ultimo pago di 10 mil dolar y te cu awe nada mas pa cual e debe a aumenta te mas di 100 miyon dolar.

Ta tur compania cu ta bula pa Venezuela, cu excepcion di esnan Venezolano tin problema pa haya nan placa.

 

Den seno di Aruba Airlines, despues cu Aserca a finalisa su contrato cu Aruba Airlines, pasobra ta Aruba Airlines ta hacienda buelonan di e.o. Valencia pa Aruba, sigui pa Miami, a dicidi di wak kico pa haci.

Tin dos inversionista Venezolano ta ser menciona pa inverti den e compania, pero Aruba Airlines no a caba di regla su problema financiero cu un di e accionistanan mayor, esta Onno de Swart, kende tin hasta beslag poni riba e fondo di e accionistanan. Esaki te ainda ta ser discuti den Corte.

 

Otro sla cu Aruba Airlines ta hayando ta e reduccion di su buelonan charter for di Miami pa Cuba, cu tabata 140 buelo pa siman, pero cu a bira 9 awor, cu companianan Mericano, e.o. JetBlue a drenta cu tarifanan asina abao, cu Aruba Airlines no por competi mas. Consecuentemente e di 3 avion cu Aruba Airlines a busca meramente p’e servicio aki a ser manda Aruba, pa studia kico pa haci.

Kier men cu Aruba Airlines a perde basta entrada cu e charternan aki.

For di algun luna caba, Aruba Airlines a stop su buelo pa Panama, pasobra ya Gobierno Venezolano no ta permiti e Venezolano pa bay swipe mas ilimita y esaki a pone cu Aruba Airlines no tin cliente mas pa Panama.

Pa loke t’e buelonan pa Miami, esaki a ser baha pa 4 pa siman, y asina mes no tur buelo ta yen.

 

REORGANISACION

Tumando na cuenta tur esaki, gerencia a dicidi pa pensa riba pa reorganisa e compania. A cuminsa studia pa ki ruta nobo pa habri, e.o. a pensa riba Santo Domingo y St. Maarten, pero manera nos a ser informa, e grupo di accionista Venezolano no ta kere den esakinan.

Ta mira direccion di Colombia, for di unda tin varios buelo pa Aruba, e.o. Avianca, Wingco, LAN y COPA cu tambe ta duna su servicio, pero via di Panama.

 

A pensa pa reduci personal di Aruba Airlines, cuminsando cu e cuerpo di pilotonan Venezolano, di cual lo no renoba nan contrato.

A papia di retira of forza e trahador Arubiano pa bay cu retiro. Esnan cu keda, lo tin cu entrega 50% di nan salario. Aki si e trahador Arubiano a para pa su derecho bisando gerencia cu pa ley Arubano, esaki no ta permisible. No por mishi cu salario existente. Tur esaki a causa un incertidumbre bao di personal di Aruba Airlines, pasobra nan no sa kende of kendenan lo wordo manda cas.

 

Diabierne ultimo e Hefe di HR, a entrega su retiro, loke a ser lamenta den seno di Aruba Airlines, pasobra aki ta trata di un persona cu amplio experiencia den mundo di aviacion, pero cu hopi ta kere cu el a ser forza di retira, y cu e no kier a bay boluntariamente.

Den e reorganisacion aki, nan ta buscando inversionista nobo, pa fortifica nan fondo financiero, pero debi n’e disputa cu Onno de Swart, mucho no por ser haci awor.

 

CASO DI CORTE

Recientemente un compania di carrental a pone beslag riba fondonan di Aruba Airlines, como cu e compania no ta cumpli cu su pagonan.

Pero Huez a duna Aruba Airlines razon y e beslag mester a wordo lanta.

 

Prome di a publica e articulo aki, nos di AWEMainta a yama un vocero di e compania pa haya nan version, pero gerencia a laga sa cu esaki ta un asunto interno y como tal nan no kier discuti’e den prensa. Un opinion cu nos di AWEMainta ta respeta, pero no ta kita nos di publica di loke nos sa.

 

Top