Aruba Airport Authority N.V. a gana premio maximo den miho servicio

Un logro historico pa tur cu ta traha na nos Aeropuerto
Tambe a gana e di 3 premio den miho aeropuerto den e region

 

“Ta cu hopi orguyo e team completo di Aruba Airport Authority ta anuncia awe cu a reconoce nos aeropuerto mundialmente cu dos premio importante den e calidad di servicio cu ta otorga na aeropuerto, debi na nos servicio excelente”, asina Barbara Brown, Chief Commercial Officer na Aruba Airport Authority N.V. a duna di conoce.

E ta referi na e Airport Service Quality Awards 2016, cu e organisacion Airports Council International a anuncia dia 6 di maart 2017. Aki Aeropuertonan grandi y chikito for di rond mundo ta competi den ken ta provee e miho servicio y experencia na pasaheronan.

 

A base regular ta haci encuesta bou di pasaheronan saliendo for di Aruba p’asina haya sa con e nivel di satisfaccion ta bou di e pasaheronan. Satisfaccion specialmente den e procesonan cu ta pasa ora di biaha.

“Como Aeropuerto ta importante pa sa unda nos ta haciendo e cosnan bon y na unda nos por mehora nos servicionan y nos procesonan”, di acuerdo cu Barbara Brown.

 

E procesonan ta encera aceso na aeropuerto, e proceso ora di check-in, e proceso di inmigracion y siguridad, e facilidadnan cu ta guia e pasahero dor di e edificio, e facilidadnan di compra di cuminda y bebida, e ambiente en general na aeropuerto, e nivel di satisfaccion general, e proceso di yegada na aeropuerto.

Total ta cualifica no menos di 34 diferente fase cu e pasaheronan ta pasa dor di nan. Ta compila e informacion a base diario, mensual y na cada kwartaal ta mand’e pa analisa p’asina haci e ahustenan necesario.

 

Desde aña 2015 a dicidi di haci e sondeo aki dor di forma parti di e prestigioso programa “Airport Service Quality” conduci dor di ACI (Airports Council International), cu ta un organo mundialmente reconoci cu Aruba Airport Authority ta miembro di dj’e desde hopi aña caba.

ACI ta representa e interesnan di Aeropuertonan, di Gobiernonan y instancianan internacional manera ICAO. Nan ta desaroya standard, maneho y practicanan recomenda pa aeropuertonan y ta duna informacion y oportunidad pa training pa hisa e standard rond mundo.

 

Un di nan hermentnan pa haci esaki ta e ASQ Survey cu ta un programa mundial cu ta sondea pasahero na aeropuertonan rib’e dia cu nan ta biaha. Tur aña e programa ta crea come 600,000 cuestionario individual den 41 idioma na 84 pais rond mundo.

Cada aeropuerto ta uza e mesun cuestionario cu ta crea un database di e industria pa asina aeropuertonan por compara nan mes cu otro rond mundo. E programa di ASQ tambe tin un parti cu ta facilita e compartimento di e miho practicanan bou di operadornan di aeropuertonan.

 

Ta presenta e “ASQ Awards” na e aeropuertonan di cual nan clientenan (pasaheronan) a duna un cualificacion mas halto durante un periodo di un aña. Ta haci e categorianan asina pa reconoce e logronan di aeropuertonan di diferente tamaño y di diferente region. Aruba Airport como tal a gana e premio di 3 luga pa Miho Aeropuerto pa e region Latino America y Caribe cu mas di 2 miyon pasahero pa aña. Ta comparti e di 3 luga cu Quito Airport.

Tambe a gana e premio como e prome luga pa Aeropuerto cu a mehora mas tanto den region di Latino America y Caribe. Es decir, aeropuerto di Aruba a resalta den e area di mehora servicionan den e region di Latino America y Caribe como esun miho.

 

“Aruba Airport ta contento di a gana e prome luga pa e aeropuerto cu a conoce mas mehoracion y tambe di 3 luga pa miho aeropuerto den e region. Nos pasaheronan ta nos prioridad principal y nos ta tuma esaki hopi na serio. E ekipo completo di aeropuerto hunto cu nos partnernan ta traha hopi duro pa duna nos pasaheronan e miho experiencia manteniendo e nivel nan mas halto di siguridad. E Programa di ASQ a duna nos e hermentnan valioso pa analisa y dirigi nos esfuersonan pa mehora y premiacionnan aki ta duna nos e siguransa cu nos ta bayendo den e bon direccion. Nos lo sigui tin e obhetivo di bira lidernan den customer service entre aeropuertonan. E premio aki no ta solamente un logro pa nos como aeropuerto pero un gran logro pa nos pasaheronan”, asina Barbara Brown a termina bisando.

 

E programa ASQ Programme ta celebra di 10 aniversario yudando aeropuertonan compronde e miho forma pa sirbi nan clientenan, conduci dor di ACI World. Ta presenta e premionan ASQ na aeropuertonan cu a ricibi e puntonan mas halto den transcurso di e aña. E ceremonia pa presentacion di e premionan ASQ ta tuma luga na e di 27 ACI Africa/World Annual General Assembly, Conference & Exhibition na Port Louis, Maritius, dia 16 pa 18 di october 2017.

Leave a Reply

Top