Aruba Baseball Bond y Powerade ta anuncia Powerade Playoff Series

Cu un directiva nobo y cu hopi energia positivo, Aruba Baseball Bond, hunto cu nan sponsor principal pa e torneo, esta Powerade, ta anuncia cu Powerade Playoff Series ta cuminsa riba diahuebs 16 di maart pa 7:45 di anochi. E prome wega ta tuma luga na Stadion Nady Croes/Crismo Angela. Algun di e weganan lo ta tumando luga na Joe Laveist Sport Park.
Pa tur wega porta di stadion ta habri ya caba pa 6:45 di atardi cu un tremendo “Happy Hour”, unda cu Mike’s Super Disco lo ta animando e publico, lo tin un bar y cushina bon surti, y fanaticonan por interactua cu hungadonan. Tur hungado hoben cu bin cu su “camiseta” di uniform bisti ta drenta gratis pa tur wega di e playoff.
President di ABBA, esta Sherwin Howell, a splica cu comunidad en general, pero specialmente e fanaticonan di baseball lo nota cambionan positivo den e mundo di baseball na Aruba awo y den periodo venidero. ABBA ta contento di por conta cu un sponsor grandi manera Powerade den e trayectorio aki pa eleva e wega y atrae mas fanatico.
Baseball, mas cu cualkier otro deporte, a produci idolonan grandi local y internacionalmente pa Aruba, y a bira tempo pa lanta e deporte atrobe, dun’e realce, y yena stadionnan pa weganan local.
E team di Hulanda/Reino Hulandes hungando den e campeonato mundial, WBC, tin henter Aruba den su gara, y ta e momento perfecto cu tur fanatico di baseball na Aruba ta super entusiasma, pa pone atencion na e liga mas halto na Aruba, esta AA, tambe.
Howell ta boga pa un structura mas moderno y agrega mas ambiente na e weganan. A acerca prensa di deporte, a acerca sponsornan nobo, y a bin cu mercadeo y promocion miho coordina. E ta corda tempo cu e weganan di play-off no tabatin suficiente luga pa pone hende den stadion, y e tipo di atendencia ey nan kier yega na dje atrobe.
ABBA no lo sinta warda mas riba subsidiecommissie of sponsor, pero ta sali busca sponsor y ta tuma un posicion mas proactivo. E intencion ta pa agrega “pre-game” y “post-game rap”, mas oportunidad pa medionan entrevista manager, coach y hungadonan, pero tambe mas oportunidad pa publico y particularmente e fanaticonan mas hoben tin mas interaccion cu e hungadonan.

E atletanan tambe merece haya atencion di e fanaticonan y e meta ta pa tin “more fans in the stands”, hisa e nivel di wega y conducta riba veld, pa produci mas talento y sostene e atletanan mas.
ABBA kier mira un dia fanaticonan ta bisti baseball cap di nan team local preferi cu e mesun orguyo cu nan ta bisti e cap di Yankees of Dodgers, of cualkier otro ekipo internacional.
ABBA ta activo tambe riba internet, y lo tin “livefeeds” di weganan pa fanaticonan cu no por bay stadion. Tambe tur scoreboards lo wordo poni riba e pagina di Facebook y e webpage di ABBA pa henter comunidad por sigui desaroyonan di e deporte na Aruba.
Howell a anuncia cu e relacion cu medionan manera Baseball Aruba, Sportszone Aruba y 297 Sports ta duna realce na e campana di promocion cu ABBA a cuminsa cune, y ta spera cu e acogida di fanaticonan lo ta grandi.
Den e playoffs tin cuater team grandi participando. E wega di diahuebs ta tuma luga na ex-Winston, awendia Stadion Nady Croes/Crismo Angela.
Di parti di Red Machine, su manager, Karel “Caicai” Williams, a comenta cu AA tin ocho ekipo y cuater a clasifica. AA ta e liga mas halto na Aruba, y mester presenta e calidad mas halto di wega tambe, el a agrega.
Pa hendenan bin wak wega, mester tin role models; esaki ta algo cu cada team mester traha riba dje, Williams a bisa. Cada team mester presenta algun bon hungado, como cu bon hungadonan ta atrae publico. Tambe, e atletanan mester dedica mas tempo na nan deporte, y ora e haci esaki e mester haya algo bek tambe, den cobertura di prensa, den e sosten di su directiva, den presencia di publico na e weganan y asina hunto cada uno ta pone di su parti pa haci baseball grandi atrobe.
Williams ta boga pa e hungado presenta bon bisti, cu un bon uniform cu ta completo y pa e presta bon ora e ta riba veld, cu respet y pasion pa wega. Disciplina deportivo ta algo cu ta esencial.
Pa ATCO Indians a conta cu presencia di manager di e team, esta Eugene Helder, kende a comenta cu ATCO Indians ta pa basta aña caba entre e teamnan mas fuerte. E biaha aki e preparacionnan no tabata cos di gaba, y baseball tabatin su “ups and downs”, pero e ta contento di mira tur hende pone cabesnan hunto na bienestar di e deporte.
E ekipo di ATCO Indians ta train riba dialuna y diaranson, y nan a haci extra esfuerso pa prepara pa e play-off actual. Helder a conclui deseando tur ekipo hopi exito.
Santa Cruz Rockets tambe a prepara pa e weganan y ta cla pa enfrenta e tres otro ekiponan, segun manager di e team, Mirto Croes. E situacion no ta di “canta macamba”, pero e team ta un bon team, a logra trece hunto bon hungado y Santa Cruz Rockets tambe ta invita tur fanatico pa ta presente na e play-off. Croes tambe ta encurasha e hungadonan hoben pa acudi na e weganan cu nan camisa di uniform bisti pa asina drenta gratis na e play-off.
Gilmar “Chejito” Croes ta encarga cu mercadeo den e directiva nobo di ABBA. El a subraya cu tur e ekiponan participando na Powerade Playoffs ta di un nivel halto y lo duna un bon prestacion. ATCO Indians, Rockets Freezone, Brazil Ceres y Red Machine ta entusiasma y e ambiente lo ta fabuloso.
Nan ta ekiponan di taya cu den e ultimo dos decadanan semper a presta riba un nivel halto.
Pa a play-off e ekiponan lo hunga “best out of five” pa e prome rond. E wega di diahuebs ta entre ATCO Indians y Brazil Ceres; y e wega di diabierna ta entre Red Machine y Rockets Freezone.
E di dos rond e ekiponan lo hunga “best out of seven” y e final ta programa pa cuminsa dia 31 di maart.

Leave a Reply

Top