Aruba entre 11 pais den Caribe papiando di e retonan riba tereno di trabao

Varios t’e topiconan riba e programa di e di 10 Conferencia Anual di Trabao ofreci pa International Labor Organization (ILO) y tumando lugar actualmente na Kingston, Jamaica. Algun di e temanan di interes colectivo y cu mas ta resalta ta, e.o., e retonan cu paisnan den Caribe ta confronta manera imigracion y desempleo hubenil.

Tambe tin sesionnan cu panelistanan renombra p’asina analisa y discuti diverso posibel strategianan di maneho.

 

Aruba ta representa n’e reunion aki pa Minister Paul Croes di Trabao. Minister Croes tabatin e honor y oportunidad di dialoga cu sr. Guy Ryder, Director General di ILO riba posibel acuerdonan bilateral cu e prestigioso organisacion.

Basicamente Minister Croes ta busca pa ricibi e apoyo tecnico y consultativo cu Aruba tin mester p’asina ta ainda mihor prepara pa atende cu cierto reto riba tereno laboral.

 

Aruba, mescos cu varios pais y islanan den nos region, ta confronta e mesun dilemanan di trabou. Tipo di encuentronan manera esun tumando lugar actualmente, ta permiti e intercambio di informacion y ideanan, ademas di estrecha lazonan cu otro paisnan pa crea esfuerzonan conhunto.

Di e manera aki por yega mas eficientemente na maneranan con pa educa y guia trahadornan pa ta mas productivo, por ehempel.

 

Minister drs. Paul Croes a mustra n’e conferencia cu Aruba ta haciendo su maximo empeño pa pone hendenan local na trabou y cu poco poco ta mirando un reduccion di e cifra di desempleo. Pa 2017 e proyeccion p’e cifra di desempleo lo ta rond di 5%.

Esaki ta un di esnan mas abou den henter Caribe. Asina mes ta admiti cu desempleo bou di hobennan ta keda un reto pa tur pais den region.

 

Top