Aruba Lions Club y Fundacion Smile Mobile cu donacion na SVGA

Stichting voor Geestelijke Gehandicapten Aruba tabatin e necesidad for di hopi tempo atras caba pa yega na un stul p’e oficina di dentista na SVGA.

E stul tabata di sumo importancia pa brinda e cuido dental necesario n’e clientenan di SVGA.

 

Tabata sra. Patricia Thiel, di Directie Volksgezondheid, cu a acerca Aruba Lions Club pa dor di Lion Igor Croes, kende ta encarga cu e fundacion Smile Mobile, cu un peticion pa un stul di dentista pa nan muchanan special cu ta bao nan cuido.

Su peticion a keda honra y diabierna 27 di october 2017, den presencia di e directora, sra. Els van Homelen, sra. Patricia Thiel, Lion President sr. Bibi Arends, maestranan y miembronan di Aruba Lions Club, cu un inversion substancial y hasi entrega di un top of the line stul nobo di dentista completamente ekipa y sin ningun gasto algun pa SVGA.

Tambe mester menciona cu SVGA lo sigui haya continuamente tur material necesario pa traha cu e stul y asina por sigui duna nan clietenan un servicio di calidad.

 

Directora di Stichting voor Verstandelijk Gehandicapten Aruba, sra. Els van Homelen, y sra. Patricia Thiel a dirigi algun palabra di gradicimento na Aruba Lions Club cu su Smile Mobile.

E Presidente di ALC sr. Bibi tambe a hiba palabra, y a bisa entre otro cu Aruba Lions Club ta celebrando su 70 aña di existencia y Smile Moblie, cu algun luna atras a bira un fundacion, a cumpli tambe 5 aña ta dunando servicio gratituamente na nos grandinan den e diferente casnan di cuido riba nos isla.

Mester menciona cu Aruba ta e unico pais den Lions Internacional cu tin un Smile Mobile y nos mester ta hopi orguyoso di esey.

 

Banda di esaki, Smile Mobile y Aruba Lions Club ta hiba regalitonan pa e grandinan riba dianan special manera dia di mama y tata. Esaki ta posibel cu e ayudo extraordinario di algun sponsor.

E servicio na nos grandinan ta encera entre otro, limpiesa di nan dentadura postizo, reparacion y ahustacion si ta necesario.

Cu e cuido aki, nos ta mira un progreso den e grandinan pasobra nan por come hopi mihor y nan boca ta keda saludabel, cu ta conduci na un bida mas saludabel.

E recompesa mas grandi cu e boluntarionan di Aruba Lions Club ta haya bek di nos grandinan, ta nan sonrisa riba nan cara ora nan haya sa cu Smile Mobile a yega cerca nan.

 

Un danki special na comunidad di Aruba cu ta sigui apoya Aruba Lions Club ora tin acitividad pa recauda fondo y ta contento di por yuda nos muchanan special y nos grandinan.

Leave a Reply

Top