Aruba Little League a atende congreso Latinamericano di baseball na Cartagena, Colombia

Riba invitacion di e representante mas halto di baseball Little League Latino Americano sr. Carlos Pagan, Aruba Little League den representacion di su DA, sr. Rhudy Donata a sali pa Cartagena, Colombia unda e congreso anual di Little League Latino Americano y del Caribe a tuma lugar.

 

Cada aña ta tene e congreso importante aki unda ta evalua e desaroyo di Little League den e area di Latino America y Caribe. E aña aki un total di 16 pais miembro a confirma nan participacion. Den mayoria caso e congreso ta trece varios cambio den e reglanan esaki na bienestar di e baseball infantil y hubenil den nos continente y region.

Un punto cu sigur a resalta e aña aki ta cu lo por tin e posibilidad cu Aruba su baseball Little League lo por bira dos liga enbez di tres liga.

 

Actualmente baseball Little League na Aruba ta consisti di ta tres liga, esta North, Center y South League, pero tin chens cu e por bira estilo di Corsou, Liga Pariba y Liga Pabou.

Mas cu claro tin cierto condicion mara n’e palabracion aki, esta cu Aruba mester crece den e cantidad di ekipo, e ora ey ta dispuesto pa coopera cu Aruba Little League pa dos liga.

Mester bisa cu Aruba a crece den e cantidad di habitante, pero e cantidad di ekipo participante den Little League baseball a bira mas poco. Awor ta keda n’e ekiponan di baseball pa traha riba e proposicion aki.

 

Un danki sigur na Lotto, e Loteria di Aruba pa medio di Comision di Subsidio cu a subsidia e biahe di Aruba Little League p’e atende e congreso Anual Latino Americano y del Caribe na Cartagena, Colombia.

 

Top