Aruba Marine Life Lecture Series ta sigui cu presentacion basa riba estudio tumando luga aworaki den nos awanan

Diaranson awo, ta sigui cu e di tres den e serie di lectura tocante di bida marino di Aruba, organisa pa Aruba Reef Care Foundation.

Biblioteca Nacional di Aruba ta pone su sala disponibel 7:15 diaranson awor 26 di april, p’asina Miranka van Breugel, estudiante di master di Biologia Marino na Universidad di Groningen, lo amplia riba parti di su estudio cu e ta conduciendo bou auspicio di Aruba Reef Care y Santa Rosa, parti di un estudio mas grandi di Global Finprint (den cooperacion cu Wageningen Marine research) haciendo e prome estudio cientifico rib’e tipo di tribon y raya presente den awanan rond di Aruba.

 

Aruba Marine Life Lecture Series

Aruba Reef Care Foundation cu e serie di lecturanan pa 2017, ya a presenta uno tocante di Lionfish 2 siman atras cu e prome orador invita tabata Gian Nunes cu a papia di Lionfish. Sigui 12 di april ultimo pa Sietske van der Wal di Turtuga Aruba cu lo papia di turtuganan arino di Aruba.

Finalmente na 10 di mei 2017 lo finalisa e serie aki cu un charla dor di Angiolina Henriquez di Aruba Marine Mammal Foundation, tocante delfin y bayena na Aruba.

 

Prome estudio di tribon y raya

Den e presentacion lo djis presenta parti di e estudio cu ta tumando luga. E ta duna publico presente un bista tras di cortina rib’e prome estudio cientifico di e indole aki den awanan di nos isla. Siña tocante di e bunita creaturanan aki cu tin Aruba como nan hogar. Tambe bin wak, pa prome biaha, den forma di primicia y estreno, imagennan di e especienan aki na Aruba. Despues di e presentacion audiovisual lo tin oportunidad pa haci pregunta y intercambia informacion.

 

Hopi informacion pa publico

E charlanan ta un oportunidad pa amplia conocemento en general pero tambe ta forma un punto pa studiantenan haña mas interes den topiconan pa estudio y proyectonan.

E charla ta cuminsa pa 7:15 na Sala Diamante na Biblioteca Nacional na George Maduro Straat y entrada ta completamente gratis.

Top