Aruba presente durante sesion di Comite di Derecho di Hende Muhe di Nacionnan Uni na Geneve

hende-muheRecientemente, durante un sesion di e Comite di Nacionnan Uni pa Eliminacion di tur Forma di Discriminacion di Hende Muhe na Geneve, Reino Hulandes a wordo someti na un evaluacion.

E sesion aki tabata basa riba un rapport periodico di Reino entrega na Nacionnan Uni na 2014.

E Comite di experto di Nacionnan Uni ta supervisa e cumplimento di e Tratado pa Elimina tur Forma di Discriminacion di Hende Muhe (CEDAW).

Un delegacion di Aruba tabata presente na Palais des Nations, formando parti di e delegacion di Reino Hulandes, encabesa pa Minister di Enseñanza, Cultura y Ciencia di Hulanda, sra. Jet Bussemaker.

E delegacion di Aruba tabata consisti di Minister di Enseñansa, Maneho di Famia y Educacion di Adultonan, sra. Michelle Hooyboer-Winklaar, ademas di drs. Bernice Schulte, Consehero di Minister y mr. Olivia Croes, Consehero di Departamento di Relacionnan Exterior, encarga tambe cu asuntonan di Derecho Humano.

Den su introduccion Minister Hooyboer-Winklaar a informa e Comite di experto cu Gobierno di Aruba ta reitera su compromiso pa sigui traha na e progreso di hende muhe na Aruba y ta haci su maximo esfuerso pa conhuntamente cu partners social logra fomenta e implementacion di e Tratado.

Asina a menciona entre otro cu e oficina pa asunto di Hende Muhe (CEDEHM) cu a keda instala na 2011, ta ofrece diferente servicio na e hende muhe, manera conseho legal, job-skills training y terapia pa grupo tocante abuso domestico.

E agencia aki ta sigui cu su trabou di educa, coach, guia y inspira e hende muhe.

A menciona e analisis realisa pa UNICEF rib’e situacion di mucha y hende muhe na Aruba.

Siguiendo e recomendacionnan anterior di e Comite internacional di experto, a instala un comision pa bin cu un plan integral di maneho di Genero (genderbeleid).

Tambe a enfoca rib’e cambionan den nos Codigo Civil cualnan a keda adopta na september ultimo, manera e posibilidad pa mayornan scoge entre e fam di mama y e fam di tata, unda antes e yiu automaticamente ta haya fam di e tata si e ta naci den matrimonio of e tata a reconoce.

E ley pa reglamenta centronan di cuido pa mucha ta na Parlamento y ta anticipa cu esaki lo wordo aproba na 2017.

Den e area di Hende Muhe den politica tin un reto grandi ainda, no solamente den participacion, pero tambe den representacion. Mientras 53% di Aruba su poblacion ta femenino, solamente 27% di e votonan durante eleccion popular ta bay pa candidatonan femenino.

Despues di e introduccion, Minister Hooyboer-Winklaar a bay over na contesta preguntanan cu ta regarda e situacion di derecho di hende muhe na Aruba. E Comite a lansa pregunta rib’e cumplimento den ley y maneho pa cu e diferente articulo hancra den e tratado.

Proteccion y cumplimento di Derecho Humano ta un proceso continuo cu tin su retonan y Gobierno di Aruba lo traha riba recomendacionnan cu bin padilanti.

Top