ARUBA SU PROME “RENEW YOUR I DO’S VOW RENEWAL EVENT”

Durante ultimo añanan, e fenomeno di “destination weddings” ta uno cu ta birando mas y mas popular unda 20% di tur casamento rond di mundo ta tumando lugar na un destinacion otro di unda e pareha ta biba. Esaki sigur ta nifica un oportunidad grandi pa negoshi pa nos turismo. P’esey Aruba Tourism Authority ta traha duro pa posiciona Aruba como un di e destinacionnan mas romantico unda por casa y of celebra luna di miel.

Esaki ATA ta haci e. o. pa medio di promocionnan y activacionnan den tur e mercadonan. Asina ATA hunto cu otro socionan turistico a organisa un asina yama “Renew your I Do’s Vow Renewal Event”.

 

Esaki ta un ceremonia di ‘renobacion di voto matrimonial’ cual evento lo tuma luga awe dia 8 di augustus benidero na e di tres playa di mas bunita rond mundo, nos famoso Eagle Beach. E evento aki lo priminti di bira esun di mas grandi den su estilo den e region di Caribe, cu participacion di mas di 100 pareha cu ta di bishita na Aruba y cu lo probecha di ta kinan p’asina participa na e evento bunita aki. E evento a hala hopi antencion internacional, muy en especial di e mercado Mericano pa medio di eventonan di antesala riba medionan social y medionan tradicional utilisando e ‘hashtag’ #ArubaIDO. Esaki a dirigi un cantidad enorme di trafico na Aruba.com pa informacion di e evento y tambe di Aruba como un destinacion romantico.

 

Aparte di e parehanan cu ta participando, e evento aki lo wordo captura pa medionan di comunicacion y tambe asina yama ‘influencers’ di e niche di romance y industria di ‘destination weddings’ riba rednan social. Entrenan ta inclui portalnan importante manera Roamaroo.com, cu presencia di Scott & Colette cu lo comparti nan experiencia y televisa esaki riba Travel Channel y tambe comparti nan experiencia cu mas di nan 300mil siguidornan riba rednan social.

 

Tambe e pareha aventurero Hanah y Adam Lukaszewicz di e popular website di biahenan den pareha Gettingstamped.com, lo comparti nan renobacion di nan “Si” riba nos bunita Eagle Beach riba nan pagina web y tambe cu mas di 382 mil siguidor riba rednan social.

Ta un honor tambe di ricibi cobertura di e website number uno mericano di boda Theknot.com cu un impactante siguimento di mas di 2.1 miyon hende. Nan lo ‘Livestream’ for di Eagle Beach y comparti cu mundo henter e romance cu Aruba ta ofrece.

 

Ademas, Aruba Tourism Authority tin e placer di anuncia e participacion di Tamra y Eddie Judge, miho conoci pa nan 9 temporada di participacion na e popular serie mericano “The Real Housewives of Orange County.” E famoso pareha aki lo renoba nan voto riba nos playanan y comparti esaki cu mas di 2.9 miyon siguidor riba rednan social.

For di e Mercado di Latino Americano tambe lo tin prensa internacional cu lo cubri e evento grandi aki.

 

Mirando cu Aruba Tourism Authority su responsabilidad nan principal ta di promove y desaroya Aruba su turismo, e aña aki, tambe a tuma lugar un activacion di e “Renew your I Do’s Vow Renewal Event” na New York durante transmission di e famoso show di television Mericano esta Fox & Friends, pa mas di 2 miyon di televidente mericano.

Tambe a organisa den ultimo añanan eventonan manera eventonan special riba Valentine’s Day na Times Square na New York, y un otro biaha riba Empire State Building como parti di Aruba su strategia diversifica den mercadonan principal, como mercadonan nobo.

 

Romance y casamento ta forma parti di e asina yama “niche” cu ta un aspecto hopi importante pa cu Aruba ya cu hopi biaha e efecto cu esaki ta causa riba nos destinacion ta significante debi n’e hecho cu e ta contribui na e beneficio economico di varios socio manera hotel, restaurant, fotografo, floresteria, wedding planners y hopi mas.

ATA tin un unit cu ta pertenece na e ekipo di mercadeo cu ta encarga su mes especialmente pa pusha y promove e diferente “niche” nan cu Aruba ta enfoca riba dje.

Diferente esfuerso ta wordo haci durante ful aña p’asina Aruba por keda “top of mind”.  ATA kier a gradici tur e socionan cu a contribui pa cu e dia aki lo bira un hopi special pa tur e parehanan rond di mundo cu lo ta partipando.

Leave a Reply

Top