Aruba ta yama bon bini na un otro drill ship “Maerks Valiant”

Directie Scheepvaart Aruba (DSA) ta yama bon bini na Aruba na un otro drill ship, “Maersk Valiant”, cu lo ta yegando diadomingo awor y lo bay ancra pazuid di Aruba.

Esaki sigur ta un otro proyecto grandi pa Aruba. E drill ship “Maersk Valiant” a sali di Golfo di Mexico pa lay-up na Aruba.

 

DSA ta un departamento gubernamental y ta resorta bou di e Minister encarga cu Transporte. DSA ta responsabel pa prepara y implementa leynan maritimo p’asina garantisa e seguridad di e trafico maritimo den nos awa nan teritorial.

Na april 2015, e Decreto Nacional cu ta stipula tarifa pa cierto actividadnan tuma luga den area nan designa den nos awanan teritorial (LB ham tarieven en vergoedingen redegebieden) a drenta na vigor. A base di e Decreto Nacional aki por cobra ademas di ancra so tambe pa actividadnan di mantencion, transshipment y bunkering cu ta tuma luga den nos awanan teritorial.

Tur fondo ta destina pa pais Aruba. E Ordenansa Nacional cu ta regula tur actividad cu ta tuma luga den nos awanan teritorial a drenta na vigor na aña 2012. Ta trata aki di e Haven-en Redeverordening.

 

Manera ya ta conoci na aña 2013 a haci un estudio rib’e futuro di e sector maritimo di Aruba, unda a keda conclui cu Aruba mester desaroya mas actividad maritimo p’asina por crea entrada nan adicional pa pais Aruba. Un di actividad nan menciona ta e ancramento den nos awanan teritorial.

Den cuadro di esaki e maneho di Minister di Transporte ta dirigi pa promove riba mercado internacional e posibilidad pa ancra den nos awa nan teritorial creando asina entrada adicional pa pais Aruba.

 

Aruba ta e unico isla den henter Caribe cu tin un area di Transshipment y un area di Mantencion designa. E area nan aki ta reconoci internacionalmente y ta poni riba mapa nautico.

E area di Transshipment ta menos profundo y relativamente trankil. E area aki ta wordo uza pa barconan cu ta ancra y tambe dor di barco nan cu ta translada carga di un barco pa otro.

E area di Mantencion ta wordo uza pa barconan cu mester haci reparacion y/of inspeccion.

 

Durante e ultimo añanan DSA a bin ta realisa diferente trabou p’asina mehora e servicio cu pais Aruba ta brinda y asina tambe contribui na nos economia.

Mescos ta e caso di e otro tres drill ship, “Maersk Venturer”, “Pacific Meltem” y “Pacific Mistral”, hunto cu “Maersk Valiant” no ta den operacion durante e temporada cu nan ta ancra den nos awanan teritorial. Nan a scoge pa bin Aruba pa motibo di e seguridad cu Aruba ta brinda. Aruba ta pafo di e zona di horcan y tin bon logistica, sin laga afo e hecho cu Kustwacht ta tene regularmente debido controlnan den nos awanan teritorial.

 

Top