Aruba tabata anfitrion di Vierlandenoverleg Onderwijs 2016

A tene reunion anual entre Ministerionan di Enseñansa di Reino Hulandes

 

Recientemente a tuma lugar navierlanden-1 Aruba e reunion anual di Ministerionan di Enseñansa di Reino Hulandes. E asina yama Vierlandenoverleg ta un plataforma cu ta beneficia tur e partnernan.

Nan ta haya e oportunidad pa discuti topiconan actual di gran importancia pa tur pais y ta cambia y agrega topiconan segun e necesidadnan y interes comun.

P’e encuentro di e aña aki a discuti y intercambia riba diferente topico den e areanan di enseñansa secundario, enseñansa vocacional y enseñansa superior.

 

Programa-Manager pa Ministerio di Enseñansa, Cultura y Ciencia di Hulanda, esta sr. Aldrik in ‘t Hout a remarca cu durante e encuentro aki a discuti entre otro e relacion di trabao y reunionnan di Inspeccion di Enseñansa y “beroepsonderwijs”, esta enseñansa vocacional.

Esakinan ta topiconan di interes general y por nota cu asuntonan relaciona na enseñansa na cada pais ta diferente, pero nan ta comparabel.

 

Un cos sigur cu ta mira den tur parti di Reino t’e ambicion cu mayornan tin, e deseo, pa mira nan yiunan cu un bon enseñansa y cu cada mucha por demostra su capacidad y talentonan cu loke ta wordo provee na nan pa nan por asina contribui n’e economia di nan pais, In ‘t Hout a laga sa.

 

Di parti di Ministerio di Enseñansa, Hubentud, Cultura y Deporte di Sint Maarten, a participa Secretario General, sra. Jorien Wuite.

El a observa cu e reunionnan ta bay bon y den bon ambiente. Sint Maarten ta haya e colaboracion importante y a mira esaki tambe den e raport cu ta indica un balor añadi di e reunionnan entre e Inspectornan di Enseñansa.

Wuite a bisa cu e ta haya cu e contenido di e discusionnan ta bon y a mira por ehempel den e presentacion amplio di Aruba encuanto e desaroyonan den enseñansa vocacional algun elemento cu por wordo aplica na Sint Maarten.

 

E reunionnan ta importante p’e 4 paisnan como oportunidad pa intercambia di idea y mantene otro informa di loke ta tumando lugar den cada pais, segun Maritsa Silberie, colaborador di maneho pa Gobierno di islanan BES.

Enseñansa riba e islanan BES ta pasando den cambionan hopi grandi y por saca beneficio di e informacion tocante di e mihor practicanan cu ta wordo comparti n’e reunionnan, mescos cu e otro islanan por saca beneficio di e informacion cu BES ta ofrece.

Silberie a añadi cu tambe nan lo por siña di problemanan cu actualmente e otro islanan ta pasando aden, y nan por den futuro haya nan mes confronta cune. E encuentronan sigur tin cosnan positivo cu cada uno por beneficia di dje.

 

Di parti di Corsou tambe a conta cu participacion di nan representante Irelnety Viscaino-Copra di Ministerio di Enseñansa, Ciencia, Cultura y Deporte.

El a remarca cu e reunion ta un plataforma unda cu ta haya oportunidad p’e islanan y Hulanda papia tocante di topiconan actual.

El a splica cu na 2015 a atende puntonan riba cual a haci un “follow up” e biaha aki, como cu sigur ta importante pa evalua unda ta para, kico e resultadonan ta, y con cada pais a atende cu e punto di discusion of preocupacion y agrega topiconan actual.

 

Un di e topiconan actual ta e “aansluiting” di enseñansa vocacional (beroepsonderwijs) riba e mercado laboral. A discuti tambe e topico di studia den region, acesibilidad di enseñansa superior na Hulanda pa studiantenan di e islanan di Reino como tambe e aspectonan di conexion y rendimento.

Naturalmente e topico di calidad di enseñansa semper ta keda un topico importante, y relaciona n’e calidad e parti di cuido cual ta un condicion importante.

 

Na final e paisnan a haci diferente palabracion concreto pa loke ta intercambio di data y informacion como tambe colaboracion bilateral of conhunto pa loke ta proyecto y iniciativanan cu por beneficia e educacion di e paisnan den Reino.

E siguiente Vierlandenoverleg Onderwijs lo tuma lugar otro aña na Corsou.

Top