Aruba tabatin un fin di siman exitoso den competencianan internacional na Florida y Ecuador

Den e weekend tras di lomba Aruba Triathlon Association un bes mas a conoce un prestacion exitoso den Caribbean Championship na Key Biscane, Florida y den e Camtri Series na Salinas, Ecuador.

N’e Caribbean Championship cu a tuma lugar na Key Biscane, Florida, e atletanan Giannon Eights, Linda Smith y Sandra Postma a logra sobre sali den un fuerte bataya contra e mihor atletanan di triathlon den nos region.

Mester bisa cu e hoben atleta, Giannon Eights a logra un prome lugar den su categoria y ta logra finalisa na un di 4 lugar overall den e evento.

 

E dos atletanan femenino, Linda Smith y Sandra Postma tambe a logra un resultado formidabel unda Linda Smith a logra un prome lugar den su categoria y un di dos lugar overall, mientras Sandra Postma a conkista un prome lugar den su categoria y un di 4 lugar overall.

N’e mesun momento na Salinas, Ecuador a inicia e Camtri Series den e deporte di Triathlon y aki Aruba su tri-atleta elite Renze Postma ta logra un di 8 lugar overall y ta kibra su record personal cu mas cu 4 minut, cual sin duda ta un prestacion di kita sombre.

 

E atleta Renze Postma pa mas cu dos luna y mei a permanence den exterior unda el a atende un campo di entrenamento na Colombia. Lotto, e Loteria di Aruba ta manda palabra di pabien n’e 4 atletanan Renze Postma, Giannon Eights, Linda Smith, Sandra Postma como tambe na coachnan Glennon Eights, Nicolaas Robert y Aruba Triathlon Association pa nan tremendo resultado obteni pa Aruba su deporte.

Top