Aruba Tourism Authority a reuni cu Su Excelencia Gobernador sr. Boekhoudt

Su Excelencia Gobernador di Aruba, sr. Alfonso Boekhoudt y CEO di Aruba Tourism Authority Ronella Tjin Asjoe-Croes a reuni recientemente pa trata e topico di desaroyo di nos Turismo, pilar di nos economia.
Presente durante e reunion tabata tambe sr. Rajen Budhulall Director di Cabinete di Gobernador y Adjudant Derk Jan Nauta Director Suplente.

CEO di A.T.A. a elabora riba e ultimo desaroyonan dunando un bista riba principalmente e dos mercadonan principal pa Aruba, esta e mercadonan di Merca y Venezuela.

Merca a cera aña 2016 cu 1.2% di crecemento compara cu e aña anterior y pa cual tin como meta un crecemento di minimo 5% pa e aña aki. Asina ta trata di compensa pa gran parti e perdida di turismo for di Venezuela.
Dicho pais a mustra un caida den 2016 y ta proyecta pa sigui cay den 2017.
Pa Merca sinembargo esfuersonan ta dirigi riba un crecemento mayor cu 5% den 2017. Un total di 11% capacidad aereo for di e mercado aki den 2017 compara cu 2016, ta un logro grandi cu lo contribui sigur cu esaki.

A toca e tema tambe di eliminacion di Visa for di Colombia y e impacto positivo cu esaki tabatin cual ta proyecta di sigui den 2017. Directora di A.T.A. a splica cu claro A.T.A. no ta maneha cifra di esnan cu lo por ta bishita pa motibo etnico y cu pues no ta kisas e turista tradicional.
Hecho ta cu pa loke ta turismo, e mercado aki a mira un crecemento significante den 2016 y ta proyecta pa sigui e patronchi aki. Hecho ta tambe cu incremento den demanda a conduci tambe na incremento di capacidad aereo cu introduccion di e. o. Wingo na december 2016 y extra capacidad di Avianca entrante april 2017.

As splica brevemente tambe kico A.T.A. ta haci pa cu maneho di acomodacion alternativo, como tambe e proyecto di ‘Cu Mira pa Futuro’, esta e produccion di un plan di desaroyo pa nos producto Aruba.

A probecha durante e reunion cu Su Excelencia sr. Boekhoudt pa haci entrega di un invitacion pa ta presente durante e conferencia di turismo crucero ‘PAMAC’, (Platinum Associate Member Advisory Council) cual ta un conferencia exlusivamente pa miembronan di nivel platinum di FCCA (Florida Caribbean Cruise Association).
Esaki ta tuma luga durante juni binidero y lo conta cu presencia di un grupo grandi (riba 100 persona) di top ehecutivonan di liñeanan crucero.

CEO di A.T.A a haci entrega di diferente otro documento tambe, incluyendo e ‘Annual Report 2015’ di A.T.A., brindando asina un miho bista riba desaroyonan den nos sector turistico y planes pa cu esaki.

Aruba Tourism Authority ta gradicido pa e oportunidad di por a intercambia di pensamento cu Gobernador di Aruba Su Excelencia sr. Boekhoudt, cu a mustra interes den nos turismo, e pilar principal di nos economia.

Top