Aruba Tourism Authority ta informa: Ta cambia sitio di evento di clausura di CATA

Pa medio di e comunicado aki, A.T.A. (Aruba Tourism Authority) ta informa cu a cambia e sitio di evento final di CATA. Cu esaki e ‘Happy Hour’ semanal na Djiespie’s Place lo continua normalmente. Debi na motibonan logistico no a logra – lamentablemente – acomoda ambos invitadonan di e evento CATA y e huespednan/clientela fiel cu ta atende tur siman e Happy Hour di Djiespie’s Place.

 

En conexion cu di 28 Conferencia Anual di Turismo di Aruba (CATA), A.T.A. conhuntamente cu su socionan ta organisando diferente evento na diferente sitio riba nos isla pa promove nos isla na 116 socionan turistico di Latino America cu ta atendiendo e conferencia aki. Durante e evento aki ta tuma e oportunidad pa mustra e autenticidad di nos isla y su hendenan unico.

 

Durante fin di siman A.T.A. a tuma e decision pa cambia e localidad di e evento di clausura. Kier gradici maneho di Djiespie’s Place y clientela pa e dispocision pa coopera.

Alabes ta extende su disculpa pa cualkier incoveniencia cu esaki por a ocasiona, specialmente na e bishitantenan di Djiespie’s Place cu fielmente ta atende e ‘Happy Hour’ semanal, un evento tan gusta den comunidad. Sigur no tabata e intencion pa crea un disgusto.

 

A.T.A. tin tur confiansa cu lo brinda e bishitantenan un conferencia ‘CATA 2017’ inolvidabel. Djiespie’s Place ta keda un luga di ‘nos’. No ta descarta cu den futuro lo por combina un magno evento manera clausura di CATA cu e Happy Hour popular.

Top