Aruba Triathlon Association lo organisa e competencia di Aquathlon Nacional

Diadomingo awor 9 di april, Aruba Triathlon Association lo organisa e Aquathlon Nacional pa tur atleta cu ta practica e deporte di triathlon.
E evento di aquathlon lo inicia pa 7or di mainta n’e lugar di custumber cu ta Boca Catalina. Lo por competi den e Half Distance y Full Distance route.

Den e categoria Half Distance lo mester core 2.5 km pa despues landa 375 m y termina un bes mas cu un careda na pia di 1.5 km.
P’esnan cu lo haci e trayectoria di Full Distance esakinan lo mester core 5 km pa despues landa un total di 750 m y por ultimo finalisa e evento cu un careda na pia di 3 km.
Mester bisa cu e deporte triatlon, aquathlon y duathlon a bira masha popular mes na Aruba den e ultimo añanan unda a acapara masha hopi atleta.

Mayoria atleta cu ta core na pia awor a tuma e reto di core bicicleta y tambe landa den nos awanan. Ya den un edad relativamente hoben e atletanan ta wordo encurasha pa practica e deportenan aki cu ta exigi atrobe un reto grandi mirando e resistencia y intensidad cu uno mester por cune.
E tres disciplina di deporte esta landa, core bicicleta y core na pia den e mesun evento no ta nada facil, sigur si mira e distancia nan cu e atletanan mester recori.
Un danki sigur na Lotto, e Loteria di Aruba pa medio di Comision di Subsidio cu lo subsidia e evento di Aquathlon Nacional 2017.

Top