Arubaanse Kunstkring ta presenta Piano Duo – Mariantonia Palacios y Francisco Sans

Cu un programa musical varia for di diferente pais di Latino America e.o. Arubaanse Kunstkring Ta Presenta Duo Pianista Venezolano Sans – Palacios, contradanza-vals-polka-mazurka-danza

Diadomingo 10 di september 2017 pa 11:00 di mainta na Cas di Cultura.

 

Mariantonia Palacios ta gusta toca piezanan di su dos compositornan favorito, Bach y Brahms, pero como pianista el a dedica su mes completamenta na musica Venezolano y Latino Americano, incluyendo e gran compositornan di siglo XIX y XX. E ta comparti su pasion pa su piano cu su esposo Juan Francisco Sans cu ken e ta bay toca den un concierto presenta pa Arubaanse Kunstkring den Cas di Cultura diadomingo mainta 11or.

 

E pareha Sans – Palacios ta dos persona cu ta biba musica. Nan bida ta musica y musica ta nan bida. E lista di reconocemento cu nan a ricibi pa nan trabou como musico ta larguisimo. Tur dos ta pianista destaca di Venezuela, un pais cu a produci hopi gran pianista. Un di nan ta Edith Peña kende a deleita nos den e Aruba Symphony Festival di 2016 y 2017 y kende ta e unico Latino Americano pa wordo nomina pa un Grammy di musica clasico na 2016 pa su album Danzas de todos los Tiempos.

 

E programa preliminar ta inclui piezanan cu nan ta stima, e. o. di Brasil:  Dos valses: Carlos de Mesquita; di Argentina: La vuelta a Mendoza (paso doble) y Pequeña Galopa: Ignacio Alvarez, El pampero (polka de concierto): Francisco A. Harfreaves. di Colombia: Recuerdos de Ubaque (vals): Julio Quevedo Arvelo; di Cuba: Tres danzas: Ignacio Cervantes; di Venezuela: Turno de baile: Pablo Hilario Giménez, areglo. Juan Francisco Sans, contradanza-vals-polka-mazurka-danza. E programa sin duda alguno lo satisface gusto di nos tur.

 

Segun sra. Palacios, no tin nada cu ta dun’e mas placer cu toca musica di camara. Ta masha placentero ora bo comparti cu otro persona lo ke bo ta haciendo. “Imagina bo con placentero e ta ora bo ta comparti hasta bo instrumento, loke ta e caso di toca piano ‘à quatre mains’. Mi a cuminsa toca cu mi casa di tempo cu nos a conoce otro hopi aña pasa. Nos a toca tur pieza pa e combinacion di cuater man, despues cu nos a strena na Venezuela hopi obra fundamental di repertorio di e combinacion ey. Tambe nos a curasha nos amigonan compositor pa skirbi obranan specialmente pa nos”.

 

Ora nan ta den concierto, sra. Palacios y su casa Francisco Sans ta trece bek na bida cu nan piano e musica stima di epocanan antaño. Temponan diferente cu semper tabatin un fiesta, un paranda of un pachanga cu hendenan amabel y cordial. Un musica cu ta sigui deleita e oido di e publico di awendia pasobra e ta alegre, emocional y podise pasobra e ta refleha e ambiente di e tempo cu e fiestanan tabata inspira hende pa comparti, disfruta y hendenan tabata asisti pa mira y pa wordo mira.

 

Ora e papia di wals Venezolano, sra. Palacios ta mustra su respet pa loke e musica aki ta nifica pa historia di su pais. Segun nos conoce nos pasado nos por splica nos presente miho.

Ademas, e ta un musica di calidad excelente cu ta bale la pena bolbe tok’e y difundi’e. P’esey, ya pa hopi tempo mi ta urgi mi alumnonan y nan amigonan musico pa traha na beneficio di nos musica.

 

Aki na Aruba nos semper a gusta e wals Venezolano cu ta mescos cu e wals Arubiano. Nos ilustre musiconan Rufo Wever y Padú Lampe a compone centenares di wals.

 

Mi ta spera di mira boso na Cas di Cultura diadomingo awo, 10 di september, 11’or di mainta.

Entrada ta AWG. 35, (miembro AWG. 30 – na porta; mucha AWG. 15 – na porta).

Caarchi ta obtenibel na DeWit &VanDorp, Plaza Bookshop y prome cu concierto na porta di Cas di Cultura.

No perde e chens aki di scucha e pareha Sans – Palacios, musiconan di cachet di Venezuela.

clydeharms@yahoo.com

Leave a Reply

Top