Arubalening mester adapta su sistema di pago di fiansa na studiantenan na Canada.

Canada, como un di e destinacionnan cu a ser promovi pa Minister di Enseñansa, a bira hopi atractivo pa varios studiante di Aruba. Desde e prome presentacion di e diferente opcionnan, studiantenan a bira curioso y interesa den Merca y Canada pa sigi nan studio.

Loke tin cu remarca ta cu e sistema di entrega di fiansa den faceta desde Aruba, no ta cuadra cu e necesidadnan y e sistema di cobransa di e studiante na Canada.

 

Un studiante cu ta depende di gran parti di su fiansa, mester maneha su placa hopi bon pa cubri tur su gastonan.

E prome suma di placa cu e ta ricibi, cual ta un “startpakket”, ta di fls 15.000 na inicio di su fiansa. Esaki ta destina pa su gastonan di biahe, gastonan pa establece su mes y eventualmente pa paga e suma minimo exigi p’e sigura su lugar na scol.

E kamber mas barata riba campus, cual hopi lo opta p’e na comienso, ta di mas o menos CD$7.000 (dolar Canades) pa dos semester.

Por paga den dos parti, pues esaki por sali di e suma di e “startpakket”. Porcierto, prijs di kamber pafor di campus no ta mucho diferente.

 

Despues, SIN FECHA EXACTO, e studiante ta ricibi e prome “termijnuitbetaling”, esta fls 12.000 cual ta CD$ 8.900.

E suma aki ta destina pa paga entre otro buki, material, curso adicional y  “tuition” di scol. Prijsnan di e diferente cursonan ta varia. Ta trata di mas o menos CD$12.000 (diesdos mil) pa aña escolar. Un studiante por paga den dos biaha si e ta desea.

Pues parti (of e suma completo) di su prome “termijnuitbetaling” por ser usa pa paga parti di su “tuition”, ya cu e suma no ta cubri e aña completo.

Aki ta unda e ahustacion mester bin.

 

Un studiante no ta ser dispensa  pa paga dia e ta haya ta bon. E tin su ultimatum pa paga cu no ta te na november of december. E ta cuminsa scol na september y mester paga ora e cuminsa.

E mesun situacion ta surgi na momento cu e studiante mester paga e siguiente parti di su “tuition”, cual ta na mitar di luna di maart, mientras e lo ricibi e siguiente “termijnuitbetaling” na luna di augustus. Pues e studiante lo por cumpli cu e pago 4 pa 5 luna despues di su ultimo fecha pa pago.

Esaki absolutamente no ta logico.

 

Un studiante cu mayor cu por sostene financieramente no tin problema, pero esun cu ta depende di Arubalening, cual mi ta supone t’e mayoria y t’e motibo ey a haci un fiansa, si lo tin problema.

Mi ta kere cu e metanan di Arubalening ta entre otro pa yuda nos yiunan di tera den nan formacion y pa duna esnan cu tin e necesidad, un man financiero pa nan por logra nan estudio avansa. Si e studiante no tin mester di esaki, e lo no hinca su mes den e fiansa cu Arubalening ta ofrece.

Mi ta conciente cu Arubalening ta depende di Ministerio di Finansa pa cu e pagonan. Ta na su lugar pa tur esnan cu ta taki di Arubalening esta Directie Onderwijs, Ministerio di Enseñansa y Ministerio di Finansa, sinta hunto, evalua y adapta e sistema.

Top