Arubiano ta duna curso avansa di hypnosis na Utah

9 persona di diferente estado di Merca e. o. Arizona, New Mexico, Illinois y Utah a gradua como hypnotherapista certifica. E curso a wordo patrocina pa Theta Wellness Center na Utah y a wordo presenta door di e yiu di tera Eddy Oduber.

Esaki ta di dos biaha cu e curso ta wordo duna na Utah y e reaccion tabata asina positivo cu Theta Wellness Center a pidi Eddy pa considera haci e curso un evento anual ya cu nan a ricibi masha hopi peticion pa participa na e curso.

 

Den e ultimo 10 aña Eddy a pasa mayoria di su tempo liber ta studia hypnosis avansa cu e miho instructornan na mundo y loke a cuminsa manera un curiosidad a bira un fascinacion. Coronacion di su carera den hypnosis tabata di a wordo certifica como un Designated Certified Instructor (DCI) pa OMNI Hypnosis Training Center. OMNI ta e scol mas grandi di hypnosis avansa na mundo y na 2016 so ta tin mas di 1000 graduado.

 

Rond di mundo hopi hende ta interesa pa studia hypnosis avansa sea ta como carera profesional, pa practica adhunto cu otro therapia of simplemente pa curiosidad.

Lamentablemente pa hopi aña no ta tin un structura estableci confiabel cu por a duna un entrenamento asina na un nivel profesional. Cu esaki na mente na 1979 Gerald (Jerry) Kein a cuminsa OMNI Hypnosis Training Center na Florida y a desaroya un programa cu ta permiti esunnan cu poco conocemento di hypnosis pa den un tempo relativamente corto por siña haci hypnosis avansa.

 

Durante di e añanan Jerry, un legendario, a haci mas cu 50,000 sesion di hypnosis cual a crea e base di OMNI Hypnosis Training Center. Pa motibo cu e tabata birando bieu, algun aña atras el a selecciona un grupo di persona cu el a entrena pa por a duna e les avansa aki y asigna nan como OMNI Designated Certified Instructor.

Na 2013, Eddy a ricibi e training y a wordo otorga e teritorio di Caribe Hulandes (OMNI Dutch Caribbean). Aunke cu na maart ultimo Jerry a fayece, e ta tin e vision pa algun aña prome a traspasa e compania pa un grupo hopi entusiasma di Suisa cual a permiti e metodonan avansa di OMNI di sigui y ta hasta crece enormemente rond mundo, particularmente na Europa

OMNI ta e unico organisacion di hypnosis na mundo cu tin e certificacion di calidad ISO 9001.

 

Pa por wordo a wordo certifica e cursistanan mester a tuma un minimo di 100 ora di training intensivo y despues di pasa e examen nan ta ricibi e titulo di hypnotherapista di OMNI.

Nan certificado ta ser reconoci pa tur e organisacion mas grandi di hypnosis na mundo.

Top