Arubianonan por ta orguyoso di tur loke e pais a logra pa bay dilanti

Prome Minister Mike Eman, di biaha despues di a yega Hulanda, a bay Aruba Huis pa reunionnan di trabou. Prome cu reunionnan di trabou el a probecha pa topa y combersa cu un grupo di Arubianonan biba na Hulanda y Hulandesnan cu tin aprecio pa Aruba y ta interesa den tur loke tin di haci cu Aruba.

Un gran parti di e grupo ta ‘senioren’ y a topa e biaha aki na Aruba Huis pa un encuentro cu Prome Minister, pero ta reuni regularmente pa encuentronan social cu Aruba como interes comun. E ciudadanonan aki ta keda den contacto cu Aruba Huis y comunidad Arubiano na Hulanda y ta hopi interesa den intercambia di pensamento y ricibi noticia relaciona cu Aruba.

 

Prome Minister Mike Eman tabata compaña pa Minister Plenipotenciario Juan David Yrausquin. Sr. Eman a gradici e grupo pa nan presencia. Ta importante pa Gobierno di Aruba keda den contacto cu su ciudadanonan bibando leu, cu kisas un dia lo bolbe Aruba.

E bishitantenan na Aruba Huis e mainta aki a haya informacion for di Eman di e ultimo desaroyonan cu tin riba e isla. El a duna informacion riba e celebracion grandi cu tabatin riba Dia Nacional di Aruba, cu inauguracion di Plaza Padu y develo di e statua di e tres autornan di Aruba su Himno ‘Aruba Dushi Tera’: Padu Lampe, Rufo Wever y Lio Booi.

“Na e momento ey historia no tabata algo mas cu algo poni riba papel, pero e tabata algo cu bo por a sinti cu bo mannan. Esey ta algo cu ta conecta nos cu otro tambe awe”, el a bisa.

 

Importante den e combersacion di Prome Minister Eman cu e grupo aki ta cu el a mustra nan con tur dia Aruba ta dal un paso di progreso y “sigur nos ta cla pa ricibi cada un di boso na momento cu boso kier bolbe boso isla”, un expresion cu a wordo sigui pa applauso di aprobacion.

Ta hustamente pa nan contacto continuo cu tur loke tin di haci cu Aruba, e grupo aki a wordo invita dor di ATA-Europe pa e encuentro cu Prome Minister Eman.

“Hopi danki pa ta presente awe na e evento aki. Ta un momento cu nos por intercambia di sentimento y pensamento riba nos isla. Principalmente door di e stimacion cu cada un tin pa Aruba”, el a agrega.

 

El a bisa e grupo cu ta masha importante pa cada un di nan carga e mensahe di Aruba na Hulanda. E mandatario a bisa tambe cu ultimo añanan por a mira den politica Hulandes un “verharding” den e posicion di Hulanda vs e islanan Hulandes. Esaki e mandatario ta kere ta debi na falta di informacion riba tur locual e islanan por nifica pa Reino Hulandes y cuanto Aruba ta haci pa ta un ehempel di Reino Hulandes.

“Nos ta hopi contento cu durante e ultimo añanan nos por a constata cu Departamento di Relacionnan di Exterior di Hulanda, bou direccion di Minister Koenders, a pone Aruba como ehempel den mundo como un pais cu a pone metanan cla pa bira un pais sostenibel na 2020 basa riba energia alternativa.”

Den e eleccion pa Hulanda por hiba su pensamento riba paisnan SIDS, a pone Aruba central como ehempel con un isla chikito por pone metanan grandi y logra hopi resultado positivo.

 

Esaki a haci cu Aruba a gana simpatia den e campaña pa Hulanda haya un asiento den Conseho di Siguridad di UN.

“Nos a logra hunto cu e otro islanan pa duna Hulanda e apoyo pa logra esaki. Aruba su aporte den esaki tabata crucial y a wordo reconoci dor di Premier Rutte y Minister Koenders.

P’esey boso tur por ta orguyoso di loke nos ta haciendo na Aruba. Pero tambe cu nos ta wordo poni como ehempel den mundo. Mi kier pa boso hiba e mensahe aki tambe tur caminda.

Aruba no a haya ni un debchi di Hulanda pa saneamento di debe.

Tur locual nos a logra na Aruba, cu recuperacion y crecemento economico, reparticion husto di entrada, a wordo logra a base di propio forsa. Esey ta un motibo adicional pa orguyo.

Nunca nos ta riba rudia, semper nos ta riba pia, canando y marchando padilanti pa hiba nos pais dilanti.” E expresionnan aki di e mandatario a causa un ola di aplauso y sentido di orguyo di tur  e Arubianonan presente den e encuentro aki.

Top