Asina POR drenta Gobierno lo trek in e medida pa cobra plachi number den un solo shot

Manera ta conoci den luna di december, Gobierno na un forma hopi abrupto a dicidi di cobra tur hende na Aruba den un solo ‘shot’ e plachi di number, sin duna previo aviso y sin duna e informacion necesario. Recientemente tabatin e accion di e trucknan pa loke ta e situacion aki.

E plataforma politico POR ta di opinion cu mester ta flexibel y duna comunidad 1 aña pa conscientisa riba e cambio aki.

 

“Siman pasa den nos rueda di prensa, nos organisacion a haci un peticion dramatico riba Gobierno mirando tur e cantidad di yamadanan cu nos a ricibi den fin di siman rib’e situacion aki. Cantidad di autobus a yama y bisa cu e ta dificil pa nan paga 600 – 800 florin den un solo biaha. A haya reaccion di diferente otro manera trucknan cu ta ‘eenmanszaak’ cu pa nan tambe e ta dificil pa nan saca e placa den un biaha, taxista y ‘car rentals’.

 

Nos ta mira un lus na final di tunnel si scucha reaccion di Minister Bermudez riba e situacion aki, unda cu el a bisa cu e lo bay percura pa esunnan cu haci un peticion lo por haya areglo di pago. Nos plataforma ta sinti cu esaki mester por conta pa tur hende durante 1 aña, mientras cu ta prepara y conscientisa tur hende riba e cambio cu a tuma luga.

Laga e ley wordo implementa pa 2018 y permiti pa tur hende por paga nan numbernan conforme locual ta nan custumber e ultimo añanan”, Otmar Oduber a splica.

 

Sr. Andin Bikker a splica na sr. Oduber cu den ley ta para cu e posibilidad di pago den kwartaal ta netamente pa duna e flexibilidad na e gran cantidad di grupo di hende cu ta depende di entradanan cu nan tin tur dia, pa por paga pa e plachi di number den 4 biaha.

Tambe pa duna e oportunidad na esunnan cu menos recurso pa tin un posibilidad di cumpli cu e debernan cu nan tin. Sr. Oduber ta opina cu Gobierno debe esaki (flexibilidad) na comunidad di Aruba.

 

Den pasado prome cu e ley a wordo pasa, sr. Bikker a informa Gobierno ‘por escrito’ cu e ta un medida inhusto cu ta tuma luga. E por mustra manera un suma insignificante (mas o menos 250 mil florin), pero mester pensa rib’e grupo grandi di hende cu ta touch cu tin cu page a base di locual cu nan ta genera for di nan trabounan diario of esunnan cu tin un cantidad di autonan pa paga pe den un solo biaha.

 

Finalmente, sr. Oduber a bisa cu e ta contento di scucha cu Gobierno ta recapacitando poco poco. A ripara ultimo tempo cu hopi di e decisionnan cu Gobierno a tuma, ta cambianan diripiente despues. Ta spera cu e alerta cu a manda como organsiacion den futuro tambe por haya e tipo di oido aki.

 

Otmar Oduber a conclui bisando cu asina POR drenta Gobierno despues di eleccion na september lo atende di biaha cu e medida inhusto aki y lo trek in e cambio haci pa cobra pueblo den un solo shot.

Top