ATA ta felicita comunidad cu inauguracion di Plaza Padu

Como parti di esfuerzonan dirigi riba un producto Aruba cu ta keda na un nivel halto pa ambos nos bishitantenan como habitantenan, na 2015 a amplia e papel di A.T.A. asina dunando e espacio pa inverti den proyectonan cu lo engrandece e experencia pa nos bishitantenan como nos localnan.

Asina ATA a bay di t’e organisacion responsabel pa mercadeo di nos isla (Destination Marketing Organisation) pa t’e Destination Marketing & Management Organisation (DMMO) cu ta inclui enfoke riba desaroyo di nos producto turistico.

 

Atencion ta ser poni e.o. na nos playanan, seguridad, tayernan di training, y promocion di nos herencia cultural.

Varios proyecto ta ta wordo ehecuta man den man cu DOW, cu kende ATA ta traha di serca primordialmente ora ta trata proyectonan infrastructural.

 

Plaza Padu ta ehempel di e colaboracion aki. T’asina cu e areanan di San Nicolas y Oranjestad, y nan desaroyo turistico, a wordo delinea como puntonan di enfoke bou di e capa di ‘desaroyo di producto’ entre otro.

Plaza Padu ta forma parti integral di e plan di desaroyo pa embeyece Oranjestad.

Hunto cu Coshecha, Plaza Padu lo mester brinda un otro area cultural den nos centro di ciudad unda por admira arte y cultura di Aruba.

 

E plaza ta honra nos Tata di Cultura, Padu Lampe, pero tambe Rufo Wever y Lio Booi, kendenan hunto a compone nos himno ‘Aruba Dushi Tera’.

A pidi artista local, Ciro Abath pa traha un obra artistico cu lo mester ilustra con nos himno a wordo componi.

For di aña 2015 ATA a cuminsa inverti den e proyecto importante aki cu a culmina den e inauguracion di e plaza diabierna ultimo, net na tempo p’asina celebra nos dia nacional di Himno y Bandera.

Riba e proyecto aki ATA a traha serca cu DOW, Van Kessel Havenbouw p’asina por percura p’e proyecto wordo realisa.

 

ATA ta kier felicita e pueblo di Aruba, Gobierno di Aruba y Tourism Product Enhancement Fund –kendenan tambe a inverti den e proyecto aki– cu inauguracion di nos Plaza Padu y alabes kier gradici DOW, Van Kessel Havenbouw, otro socionan p’e bon cooperacion durante e proyecto aki.

ATA lo keda enfoca riba inversionnan cu ta eleva calidad di nos producto turistico y ta cuadra cu maneho turistico delinea p’e proximo añanan, cu ta inclui sigur ‘embeyecemento di nos producto’ y ‘mas presencia di nos cultura y locual ta autentico di nos Aruba’ den e experiencia di e bishitante, cu claro ta permiti nos comunidad tambe pa beneficia di dje.

 

Top