ATA ta prepara introduccion di campaña pa henter region Latino America

Recientemente, e ekipo di Aruba Tourism Authority a reuni na Bogota, Colombia pa asina topa cu e agencia nobo, Mullenlowe cu lo ta encarga cu mercadeo di Latino America, como region, conhuntamente cu oficinan representante di Aruba pa cada mercado.

Meta tabata pa sigui traha riba integracion moviendo mas y mas pa un acercamento ‘regional’ pa cu e continente aki. Tambe a discuti campaña cu lo lansa pa e henter e region.

 

Representenan di e difererente mercado por a alinea rib’e campaña, strategia y tacticanan. Despues di e cambio di stragegia di move pa 1 agencia responsabel pa tur disciplina den region enbes di varios agencia den diferente mercado pa diferente disciplina, ta importante cu tur mercado ta alinea rib’e direccion. Esaki ta importante mirando cu cada mercado mas cu claro lo mantene nan responsabilidad pa sigura cu e mercado ta cana bon.

 

Seleccion di un agencia integral y transmedia pa Latino America

Aña pasa Aruba Tourism Authority a pasa den un proceso di selecciona un agencia di mercadeo integra cu lo enfoca rib’e area di publicidad, digital y public relations. E proceso aki a forma parti di e strategia nobo pa centralisa y integra tur esfuerso rib’e area di mercadeo pa cu e mercado di Latino America.

 

Aña pasa den luna di november ehecutivonan di ATA a ricibi un presentacion di 4 agencia cu a wordo escohi for di un lista di 9. E 4 miho agencianan a wordo evalua a base di diferernte rekisito y mester menciona cu tur ta companianan cu tin hopi experencia riba nivel global y cu ta operando caba den e modelo regional.

Durante e encuentro aki a duna e agencianan e oportunidad pa presenta un strategia integral cu lo ta mara na crea un estimulo den e region pa bishita Aruba y contribui na logra obhetivonan pa crece e mercado den Latino America. For di e 4 agencianan aki e compania conoci mundialmente Mullenlowe a wordo escohi como e agencia ganador cu lo ta trahando cu ATA.

 

E comite cu a percura y garantisa cu tur aspecto clave den e proceso aki a wordo tuma den concideracion a consisti di; CEO di ATA, Ronella Tjin-Asjoe-Croes, Sanju Luidens CMO di ATA, Sjeidy Feliciano Communications Manager, Miriam Dabian Area Director pa ATA LATAM, Francis Lacle Digital Specialist, Maria Victoria Galán Directora di Colombia, y Johana Santiago PR & Communication Manager Venezuela/ Digital marketing Latin America.

 

Mullenlowe ta un compania mundial cu ta wordo considera como un agencia boutique cu oficina den mas di 65 pais y pa e area di Latino America tin 19 oficina cu ta wordo maneha dor di e oficina regional situa na Bogota. Mullenlowe ta consisti di agencianan unico y diferente cu ta kere den resolve reto di nan cliente por medio di ideanan disruptivo y creativo.

Tur esakinan ta factornan importante cu sigur lo trese resultadonan positivo pa Aruba.

E campaña nobo lo ser lansa den luna di maart proximo.

Top