Atacando personal di seguridad…. Grupito Venezolano a cometé destruccion na terminal na Hato

WILLEMSTAD – Ayera mainta e mecha di pòlvo a explotá na Aeropuerto Hato den e terminal di salida ora cu primeramente un biahero Venezolano femenino a pèrdè cabez y a cuminsa tira stul di Café Barista kibra un television y a agredí un empleado di Café Barista, cu apesar di a haña asistensia di un colega, no por a tranquilisá e muher.

 

Ora agentenan di seguridad a yega, nan tambe a haña y e muher cu mientrastanto a haña refuerso di otro biaheronan Venezolano, a burdugá cu e vigilantenan y a rascá nan cu uña.

Riba esey a tuma paso drastico y a arestá e dos muhernan y un homber cu tabata den e bochincha y mester presentá nan dilanti di un Fiscal auxiliar pa dicidi ki ta haci cu nan.

Reportadamente e muher ta forma parti di un grupo di turista cu ta pegá for di dialuna na Corsou.

 

Ayera mainta Inselair a cancelá e buelo pa Venezuela dos biaha y ora e señora a bay puntra ki ta pasa, e no a gusta e contesta y a hisa stul di Cafe Barista manda riba e negoshi kibrando un television.

Ora otro empleado di e negoshi kier a tene e muher pa tranquilisé, un otro a sali for di left field  bin yuda agredi nan hunto cu un otro homber. Tur esaki dilanti di dos yiu cu tabata biahando cu e muher.

Nan tabata haci un bochincha di otro mundo gritando tur clase di insulto ordinario y bulgar y pa nada di mundo no kier a keda keto.

 

Dos Polis di CAP cu tabata riba tereno a acudi pa controlá e situacion y nan tambe a haña, pero nan a detené e dos señoranan plus un homber.

Ta ora e señora cu a start e ‘berinche’ a realisá cu e tabata di boei, el a cuminsa yora y pidi pordon y ofrecé pa paga e daño, pero a mustré cu e empleadonan cu el a menasá lo haci denuncia y mester presenté dilanti di Fiscal.

Esey a pone cu si e buelo sali pa Venezuela e muchanan tin cu biaha cu otro hende.

 

En todo caso e gerente di Cafe Barista a cobra e muher 500 dòlar pe television y e señora a pagé 380 euro lagando e cos eynan.

Gerente di e negoshi sr. Cedric Sprock a splica cu el a keda altamente alarmá pe incidente, pasobra no te intencion pa su trahadornan sali fo’i nan cas bay traha y haña nan cu peliger di bida.

Den casonan asina cu e situacion manera e ta, CAP mester tabata pro activo y tin hende stacioná den e terminal di salida promé cu sla cay.

 

Sigur despues di e bochinchanan cu tabatin diadomingo ultimo ora cu un grupo di Haitiano mester a biaha pa Port au Prince y no tabatin avion, nan a tira nan curpa na suela, maldicioná tur trahador di e terminal y menasá cu nan ta cuminsa likidá hende.

Cedric Sprock a condená cu tin menasa contra trahadornan di e terminal siendo cu tur hende sa ki te problema.

Top