ATIA a ricibi varios update di parti Minister Richard Arends riba varios topico importante

Den un reunion entre directiva di ATIA hunto cu Minister Richard Arends varios topico cu ta importante pa comercio a wordo trata.

Entre e temanan, ATIA a pidi un update riba e San Nicolas Special Zone cu tin hopi tempo riba mesa, pero cu nunca a wordo finalisa.

Awor mas cu nunca cu apertura di CITGO e incentivonan cu e asina yama ‘begunstigend beleid’ ta ofrece, ta mas importante cu nunca.

E ta un instrument pa trece companianan San Nicolas.

 

Minister di Asunto Economico, Richard Arends a informa ATIA cu e ley ta na Directie Wetgeving y asina cu e version final ta cla e lo bay Parlamento, pero cu esaki lo no tuma hopi tempo mas. Ya caba tin hopi compania cu a aplica y ta cla pa habri nan oficina of un sucursal na San Nicolas segun Minister Arends.

 

A continua cu e topico di un One Stop Shop na Aruba. Un di e obstaculonan mas grandi cu ta wordo menciona dor di e comerciantenan local t’e asina yama “Red Tape” cu ta crea hopi tardansa den e procesonan cu un negoshi tin cu cana pa habri, expande of pa adkiri cualke permiso necesario pa por funciona.

ATIA ta wak e necesidad pa un One Stop Shop caminda e comerciante por haci su peticion y ta keda cla cu tur documento necesario na un solo lugar y den un tempo adecuadamente cortico.

Actualmente ta haciendo un estudio riba e structura y forma cu e One stop Shop aki mester opera aden pa por ta exitoso.

 

E tema di Caya Grandi ta keda uno dificil, pero cu no mester wordo perdi di bista. Minister Richard Arends a informa cu Gobierno ta trahando cu un grupo di Miami, esta e grupo tras di e Proyecto Wynwood caminda a revitalisa un parti di Miami por medio di arte, y ta mirando e posibilidadnan pa revitalisa e area di Caya Grandi usando algun di e ideanan di e grupo aki. Ademas ta evaluando e posibilidad di introduci cierto incentivo fiscal den cierto area incluyendo Caya Grandi.

 

E problematica di e minimarkets cu ta habri na cada skina den diferente bario ta uno cu ta preocupa ATIA.

Segun informacion di Minister Richard Arends, e cifranan ta mustra cu e cantidad di peticion a baha drasticamente.

Esaki probablemente dor cu a bin cu cierto stipulacion caminda no por habri un negoshi riba tereno erfpacht.

Esaki t’e unico manera cu Gobierno por controla e cantidad di minimarkets. Miando cu tereno priva ta mucho mas caro, e interes a baha substancialmente.

Ademas no ta duna permiso mas p’e asina yama ‘convenience stores’ cu por keda habri 24 ora.

 

Un di e puntonan cu tin hopi importancia pa ATIA ta entrepreneurship. Minister Arends a finalisa e reunion informando ATIA cu na april lo habri un oficina di Credits na Aruba cu ta un instancia cu lo duna financiamento te cu 50,000 florin na negoshinan chikito cu ta cuminsando. Actualmente ta dificil pa negoshinan cu kier lanta pa haya financiamento y e instancia aki den colaboracion cu banconan local, lo facilita esaki.

ATIA ta sostene e iniciativa aki y lo apoya esaki den cualke forma cu ta necesario.

 

Na final di reunion a keda palabra cu ATIA y Minister Richard Arends lo reuni pronto atrobe pa follow up riba e puntonan aki entre otro.

Leave a Reply

Top