ATIA cu sesion informativo encuanto e estado di Aruba su economia

ATIA conhuntamente cu sr. Ryan Peterson, General Manager di Economic Policy na Banco Central di Aruba, a presenta un sesion informativo encuanto e estado di Aruba su economia exclusivamente pa miembronan di ATIA.

Sr. Peterson a presenta cifranan di e di tres kwartaal di 2016 te cu september den comparacion cu añanan anterior y a toca e siguiente temanan: Consumo, inversion, turismo y importacion.

 

Pa loke ta consumo por a mira cu e confianza di e consumidor a baha. Inversionan a subi dor di proyectonan andando.

Turismo den e transcurso di e añanan a baha, excepto pa loke ta bishitantenan di crucero.

Y por ultimo, importacion a subi compara cu 2014 y 2015, pero a baha compara cu 2013.

Loke a resalta di e presentacion aki ta cu nos economia actualmente ta stagna y no tin crecemento nificando cu nos ta den un recesion.

 

Si compara e Nominal GDP Growth di 2003 y 2016 (actualmente e ta na -2%), Aruba su economia ta para mesun caminda.

Esaki ta indica cu a yega e momento pa cambia e modelo economico cu Aruba ta tin p’e ultimo 30 añanan.

E modelo aki a traha den pasado, pero actualmente no ta funciona mas mirando cu nos ta den un asina yama ‘slow burn effect’.

Como pais ta importante pa pensa riba modelonan alternativa y pa wak den ki direccion nos kier bay.

 

Ta importante pa dor di inovacion y reforma adapta y sincronisa e sector publico y e sector priva pa por haci uso di e oportunidadnan cu tin.

Pa alcansa esaki mester bin cambionan necesario e.o. riba terreno fiscal, laboral, legal y educacion.

Esaki ta areanan cu ATIA semper a bin ta boga pa trece cambio pa mehoracion.

ATIA como e representante di comercio ta haya importante pa ta den contacto continuo cu instancianan manera Banco Central di Aruba p’asina acumula informacion y comparti esaki cu su miembronan.

 

Na luna di april ATIA lo organisa e siguiente sesion cu cifranan di e prome kwartaal di 2017 p’asina sigi e desaroyo di nos economia di serca.

 

 

Top