ATIA preocupa cu proceso di “leggerwaarde” na Departamento di SIAD

Pa algun luna caba ATIA ta vigila e proceso di ricibi “leggerwaarde” for di SIAD pa cu transaccionnan di propiedad, benta di cas, extension di tereno etc etc.

Miembronan di ATIA y comercio, pero tambe individuonan cu ta desea di inverti den un cas ta keha con largo procesonan di transaccion ta dura na notarionan pa motibo di e balor cu SIAD tin cu establece.

 

E proceso aki, aunke cu e por wordo mira como un proceso relativamente simple, ta haci un efecto grandi riba transaccionnan financiero, y consecuentemente riba nos economia.

Personanan cu ta desea di haci un transaccion pa medio di notario tin biaha ta warda lunas p’e balor di e propiedad wordo determina dor di e departamento aki, y como consecuencia un actividad economico, cu hopi biaha ta crea trabou den nos sector di construccion, ta tranca.

 

P’e mesun motibo aki, nos banconan ta haya nan den un situacion cu nan ta cla pa financia un cliente un cas, compra di un tereno, construccion di edificio nobo etc., pero e transaccion no por tuma lugar pa motibo di un departamento cu no ta cumpliendo pa establece e balor cu Gobierno ta duna n’e propiedad.

E propio Gobierno ta perde di ricibi su parti di e transaccion nan aki.

 

Nos economia mester pa inversion tuma luga eficiente, y no por acepta un situacion causa pa un departamento, cu pa lunas caba no ta funcionando manera mester ta.

ATIA ta spera cu Departamento di SIAD y e Minister encarga n’e momento aki, presta atencion n’esaki p’asina re-establece un servicio cu ta di sumo importancia pa comercio, inversion, trabou, entrada di Gobierno, empleo y pueblo en general

 

ATIA ta keda vigila e proceso aki, pero ta spera cu e servicio aki wordo treci bek na un nivel normal, y asina re-establece cu nos sector financiero, construccion, Y tur otro transaccion cu ta depende riba e servicio aki, por ser agilisa na beneficio di comercio, nos economia y tur su efectonan cu inversion eficiente tin pa henter nos pais.

 

 

 

Leave a Reply

Top