ATIA tabatin un reunión fructífero cu Minister di Trabao

 

 

 

 

 

 

Un di e topiconan hopi importante pa ATIA t’esun di trabao. Ta p’e motibo aki, ATIA a solicita un reunion cu Minister di Trabao Paul Croes pa trata temanan cu tin di haber cu trabao. Tambe a invita dos miembro dunador di trabou grandi, esta Horacio Oduber Hospital y Pro-Tech p’asina por ta parti di e reunion.

Segun Minister Croes a sera aña 2016 cu un porcentahe di 7.4 di desempleo y pa 2017 ta proyecta cu lo baha esaki te na 5%.

Nos a wordo informa cu di acuerdo cu un protocol firma recientemente Directie Arbeid en Onderzoek lo presenta e cifranan laboral den colaboracion cu Banco Central di Aruba y CBS desde e aña aki.

 

E 2% menos di desempleo cu ta anticipa pa 2017 lo ta un efecto directo di e rehabilitacion di e refineria.

Pa prome biaha a firma un acuerdo formal, un trabao regime, den cual ta stipula cu CITGO mester cumpli cu e regla di 80/20. Esaki kiermen cu den 80% di e posicionnan den e compania mester wordo ocupa pa trahadornan local.

 

Un di e temanan cu ATIA especificamente tabatin interes den dje ta con e proceso di reclutamento pa CITGO lo cana.

Tin companianan den varios sector cu a contrata ex-empleadonan di Valero y aworaki ta premira cu nan lo perde e empleadonan aki bek na CITGO.

Tin un escasez den personal cu conocimiento tecnico y esaki por forma un problema grave pa tal companianan.

 

Minister Paul Croes a splica cu a institui un asina yama “Energy Sector Employment Registry (ESER)” cual ta un database di tur e personan cu a aplica via e sistema aki y cu tin sea educacion profesional of experiencia den e ramo tecnico y mecanico.

E registro aki, no ta solamente pa trahadornan interesa den un posicion na CITGO, pero p’e sector di energia (alternativo) en general.

Asina ta cu companianan cu necesidad di trahadornan tecnico tambe por acudi n’e registro aki. Ya caba un total di mas o menos 1500 persona a keda registra den e ‘ESER’.

 

Na mes momento ta trahando riba un reorganisacion dentro di DIMAS pa institui un proceso mas eficiente.

Esaki lo facilita e proceso y haci’e mas transparente p’e companianan cu lo perde trahador tecnico den e casonan cu no por haya trahador local cu ta specializa den e ramo pa yena e posicionnan.

Ta trahando tambe hunto cu e trayecto tecnico di EPB, EPI y Openbare Leergangen p’asina facilita e alumnonan di e sector aki cu e certificacion necesario pa drenta e sector di energia, pero tambe e refineria, p’asina crea continuidad dor di empleadonan local.

 

Finalmente, ATIA a toca tambe e tema di ketenaansprakelijkheid y e control riba empleo ilegal y companianan cu ta desconta loonbelasting y primanan for di nan empleadonan, principalmente e primanan di pensioen cu actualmente no ta  wordo cubri dor di e asina yama wet ketenaansprakelijkheid, pero no ta paga esaki na instancianan concerni.

Esaki ta pone miembronan di ATIA cu si ta cumpli cu reglanan den un posicion di desbentaha. Minister a trece dilanti cu e control aworaki ta wordo reinforsa pa medio di un taskforce consistiendo di varios departamento manera e.o. DIMAS, Warda Nos Costa, DPL, y pronto lo inclui tambe e Departamento di Impuesto.

ATIA ta mira atras riba un encuentro hopi informativo y ta gradici Minister Paul Croes p’esaki.

Top