ATIA y Douane colaborando pa trece curso pa brokers

 

 

E siman aki a tuma lugar un sesion informativo pa tur compania cu ta declara carga y mercancia. Riba peticion di varios compania importador, Douane cu asistencia y facilitacion di ATIA lo ta treciendo un curso den cual lo toca tur tema cu tin di haber cu e proceduranan di declaracion di mercancia na Douane.

Meta di e curso ultimamente ta un mihor servicio, cu lo aporta na crecemento di economia di Aruba y lo stimula comercio internacional.

 

Transaccionan comercial ta cana bon solamente si e fluho di informacion y documentonan ta bon organisa.

Conocemento di e procedura y e capacidad pa aplica e proceduranan aki corectamente ta sigura cu e productonan por move sin tardansa inecesario.

E curso “Declarant Douane” lo ofrece conocemento intensivo di e legislacion di Douane na un manera practico p’asina e brokers por tin un mihor comprension di e proceduranan y asina anticipa na mes momento unda por tin posibel problema y con pa resolve esakinan na un manera efectivo.

 

Lo ripiti e curso mas despues den aña p’asina por brinda e oportunidad na tur broker na Aruba pa haci e curso.

Durante e reunion, señor Marcelito Pablo como cabesante di e curso a informa un sala yen, di tur e detayes di e curso cu lo cuminsa 2 di maart y lo finalisa na final di juni cu un examen.

E interes tabata hopi grandi y e prome tanda di e curso ya caba ta casi yen cu un maximo di 25 persona.

E curso lo tuma lugar tur diamars y diahuebs di 6:30 pa 8:30 di anochi na oficina di ATIA.

Pa mas informacion por tuma contacto cu ATIA via info@atiaruba.org

 

 

 

Top