Atletanan elite di pesas Jennifer Piter y Joel Kuiperi a sali rumbo campeonato Norte, Centro Americano y del Caribe Levantamiento de Pesas na Guatemala

Di dianan 19 pa 24 september benidero, dos atleta elite den e deporte di pesas formando parti di e seleccion di pesas di Aruba lo sali rumbo pa campeonato fundamental clasificatorio na Guatemala City.

Den competencia aki e atletanan Jennifer Piter kende lo competi den categoria 63 KG y Joel Kuiperi kende lo competi den e categoria 105 KG lo sali midi forza riba plataforma contra cu e mihornan den nos region Centro Americano y del Caribe.

E evento lo ta uno clasificatorio unda mas di 15 pais lo ta presente y buscando nan representacion pa Weganan Centro Americano y del Caribe Barranquilla 2018.

 

Mester bisa cu e atleta Jennifer Piter lo mira accion dia 21 di september, mientras e atleta Joel Kuiperi lo mira accion riba dia 22 di september. Ambos atleta a prepara nan mes debidamente p’e competencia aki unda sigur nos por spera un bataya pa ranking di cual nan lo duna todo por todo pa por logra nan cupo den e Weganan CAC.

Tanto Jennifer y Joel tin un amplio experencia den competencianan internacional y den pasado tur dos a logra obtene medaya pa Aruba. Es mas tanto Jennifer y Joel ta poseador di varios record Arubano den e deporte di hisamento di peso.

 

Un danki sigur na Lotto, e Loteria di Aruba pa medio di Comision di Subsidio cu a subsidia ebiahe di e atletanan Jennifer Piter y Joel Kuiperi pa campeonato Norte, Centro Americano y del Caribe Levantamiento de Pesas na Guatemala City, Guatemala.

Top