Autoridadnan tin lista di cosnan iregular cu Jamaloodin a cometé

WILLEMSTAD – E fugitivo te diabierne Jorge Jamaloodin tin un lista di asunto menos legal di cual Ministerio Publico ta sospechá cu el a cometé.

Contra Jamaloodin tin un lista formidabel di acusacion di cosnan ilegal cu el a cometé, pero tur hende sa cu e motibo principal pa cual el a bandoná Corsou ta pa su supuesto envolvimento den e asesinato di Wiels.

Ainda tin detayenan manera e sospecho cu el a soborná un figura basta prominente di VDC.

Autoridadnan a haña sa esaki despues cu nan a interceptá mensahenan cu e dosnan a intercambiá.

E tempo ey e asunto aki tabata asina serio cu e Parlamentario Hulandes Ronald van Raak a busca y haña documentonan confidencial cu ta relatá resultado di e investigacion contra Lawrence Pietersz, èx Hefe di Seguridad interno y externo di VDC.

SCREEING TABATA CHANCHUYO
MAYOR
For di e investigacion interno a sali na cla cu Jamaloodin a paga Pietersz soborno, pero e dato aki no a aparecé den e rapòrt di screening pa Jamaloodin bira Minister.
Jamaloodin tabata conectá cu otro via SMS y a discuti riba alteracion di resultadonan di screening fuera di conocemento di e Hefe di e tempo ey sr. Gumbs.
Asina a bin sali na cla cu Pietersz tabata debe Jamaloodin placa, un montante pa mas cu el a pidi pa fia.

E mensahenan a pinta un cuadro temebroso caminda Pietersz lo a pasa masha informacion pa Jamaloodin tambe di empleadonan di Aduana.
Pietersz tabatin masha bon relacion cu èx Promé Minister Schotte, kende ta condená caba y tin cu presenta atrobe den Corte den Apelacion di su caso.

Aparte di e problemanan penal Jamaloodin tin problema civil tambe cu su èx Hefe di Seguridad di su compania na Saliña y tin caso den Corte caminda e tin cu paga e èx hefe balente suma di placa.

Pa no papia mes di loke e èx a mira y tende den oficina di Jamaloodin di hendenan cu tabata bin tuma ènvelòp cu 20 pa 25 mil florin tur luna.
Y tin tambe e lista di iregularidadnan cu el a cometé como Minister biahando pa loco riba cuenta di Gobierno entre òctober 2010 te cu augùstùs 2012.
No solamente eseynan, pero e tabata laga otro hende tambe riba cuenta di Gobierno y tabata ‘wine and dine’ riba cuenta di Gobierno sin sikiera producí vale cu Gobierno mester a paga.

Durante e banketenan cu e tabata organisá e ambiente tabata di “…overmatig alcoholgebruik….” manera SOAB a señalá.
Di e forma aki Jamaloodin a ‘wine and dine’ pa un total di NAf. 111.195,26 riba cuenta di Gobierno.

Top