Avianca ta amplia su buelonan di y pa Colombia cu 4 extra buelo pa siman

Den oranan di diahuebs atardi sra. Viviana Martin, Presidente y Gerente General di Avianca Costa Rica a haci un bishita serca Prome Minister Mike Eman pa dun’e e bon noticia cu Avianca ta bay amplia su buelonan pa Aruba, for di dia 17 di april cu 4 buelo extra cu ta suma un total di 11 buelo pa siman. Esaki ta nifica 480 stoel extra pa siman.

 

Sra. Vivian Martin: “Semper cu nos reuni cu autoridadnan di Aruba un bes pa aña, ta pasa algo positivo. Awor tin 7 buelo pa siman di Avianca pa Colombia y nos a wordo pidi pa aumenta e buelonan aki mirando cu na Aruba tin un comunidad grandi di Colombiano.

Nos a haci un revision y awe nos por trece bon noticia pa Aruba.

For di dia 17 di april awor, nos ta bay aumenta e buelonan cu 4 extra. E extra buelonan aki ta bay ta riba diabierna, diasabra, diadomingo y dialuna den oranan di mainta.”

 

Sra. Vivian Martin tabatin palabranan di gran aprecio y gratitud pa Prome Minister Eman pa su aporte den esaki.

Prome Minister Eman a bisa di ta masha agradecido p’e decision importante aki di Avianca. “Mi por bisa tambe cu esaki ta un deseo di President Juan Manuel Santos ora mi tabata na Colombia algun siman pasa unda nos a papia hopi di un combinacion di e destinacion turistico entre Aruba y Colombia.

Tin un cantidad creciente di pasahero cu ta bin di Estados Unidos y cu ta interesa den biahenan combina. Colombia ta un destinacion ideal pa nan.

Prome nan ta bin aki pa disfruta di nos beachnan pa sigui pa Colombia pa gosa di e naturalesa y eco-turismo eynan.”

 

Eman a bisa cu pa Aruba esaki ta un gran oportunidad pa amplia e cantidad di turista cu ta bin di Colombia y na mes momento tambe ta un bon idea pa intercambia un vision unda Aruba por ofrece e turistanan di Colombia biahenan combina.

“Pa logra esaki ta importante pa tin mas stul. Cu Avianca ta amplia su buelonan ta un paso den e direccion ey.”

Mike Eman a gradici sra. Vivian Martin y henter su ekipo p’e bon decision aki cu ta un bon noticia pa turismo di Aruba.

 

Top