AVP a celebra Dia di Tera cu accion di limpiesa na costanan pariba

Minister y Parlamentarionan di Partido AVP a uni forsa cu e hobennan di e hala hubenil HAC pa tene un accion di limpiesa y di e manera aki conmemora Dia di MamaTera.

Diasabra mainta, politico y sostenedornan di Partido di Pueblo Arubano y miembronan di Hubentud Activo y Consciente a topa na Savaneta for di unda a sali cabes pariba y a pone man na obra na beachnan di Grapefield y otronan puntonan na costa Noord di nos dushi isla.

 

Lider di partido AVP Mike Eman tabatey pa gradici y duna apoyo na tur e boluntarionan y pa participa su mes tambe na pikimento di sushi.

“Nos ta hopi contento cu awe riba Dia di Mama Tera nos por a bini hunto di parti di Ministernan, miembronan di Parlamento y hopi boluntario. Awe cada un a demostra den e forma con a duna nan aporte, cu nos tur stima nos isla y cu nos tur kier contribui na nos isla fuertemente”, asina Eman a bisa.

 

Na su opnion, e amor cu cual e trabou aki a wordo haci ta demostra cu tur hende tin un sentimento hopi special pa nos isla; un sentimento pa contribui na e limpiesa di nos isla cu ta simbolisa hopi tambe e amor cu partido y Gobierno a bin ta pone dilanti.

“Pa na 2020 Aruba un pais completamente berde sostenibel caminda nos ta proteha nos medio ambiente y nos ta ehempel pa mundo”, lider di partido a reafirma rondona pa colega y boluntarionan. Eman ta gradici di curazon tur cu a colabora.

Top