AVP a prepara p’e cambionan por continua pa Aruba por sigui Padilanti

Durante presentacion di Plan di Partido di AVP, “Aruba Padilanti 2017-2021” líder di AVP Mike Eman a papia di e importancia cu e plan aki ta pa Aruba sigui riba e caminda di progreso pa un y tur.

E ta un plan cu ta delinea loke cu e pueblo kier mira den e proximo Gobernacion, un plan cu a wordo traha a base di consulta haci den e evento 1000Voz.

 

E lider a papia di e dos Gobiernonan cu el a lidera di 2009 pa awor, unda cu e enfasis tabata poni riba rescata y renoba Aruba.

Awor cu e Plan Aruba Padilanti, e lider ta hopi emociona di por logra esaki mirando cu partido AVP tin e mihor team pa ehecuta e plan pa hiba Aruba na un otro nivel.

 

“Nos por bisa “Aruba Padilanti” cu certitud y cu confiansa den nos curason, pasobra AVP tin e mihor ekipo, e mihor team. y e mihor programa. Prepara pa hiba Aruba padilanti, pa hiba e pueblo padilanti,” cu bos yena di emocion Eman a bisa e publico cu a presencia presentacion di e Plan di Partido.

Un mensahe hopi positivo y di speransa e politico di AVP a duna e anochi aki n’e publico, pa mustra un y tur cu e bon trabou mester sigui pa Aruba y su hendenan.

 

“Boso tabatin e claridad di e bon trabou, e ta bisto den tur bario, den nos centronan di ciudad unda cu bo cana, e scolnan renoba, e grandinan cu awe tin un tiki mas cen dor di aumento di pensioen; reparatietoeslag p’esnan cu salario minimo.

Tur e hendenan aki ta bisabo cu e Gobierno aki tin nan den su curason, pasobra tin e reparatietoeslag cu ta sali directamente for di fondonan di Gobierno pa yuda esnan di menos recurso di e pais aki.

Cana rond di Aruba, topa mamanan soltero cu ta biba di bijstand, cu antes tabata biba cu 607 florin te ora cu Gabinete Mike Eman a yega y a redobla e bijstand y pensioen.

E Gobierno di AVP tin e alma y curason pa sirbi e pais aki,” Eman a bisa bou aplauso continuo di  e publico presente.

Tur hende por mira e cambionan cu pais Aruba a pasa aden y mester ta convenci cu AVP a prepara p’e cambionan aki por continua pa Aruba por sigui Padilanti.

 

 

Top