AVP: Riba su ley di castigo minimo, lider di MEP gañando pueblo pero gañando su mes prome

Un lider politico cu ta anhela pa yega na poder pa goberna nos pais, mester ta un hende di kende pueblo ta bon na altura cu e ta honesto ora cu e papia cu pueblo.

Sinembargo na momento cu presenta un lider politico cu no por ta honesto ni cu su mes, anto e ora pueblo ta ser someti na un situacion serio ya cu si e lider politico no por kere den su propio berdad, ta con pueblo por kere cu e ta sincero y honesto.

 

Fraccion di AVP ta mustra cu lider di MEP, Evelyn Wever Croes ta insisti pa no bisa pueblo e berdad di su iniciativa di ley, caminda e kier a presenta un cambio di ley pa stipula castigo minimo pa abuso sexual contra menornan di edad.

Mientras cu siman tras di siman, Evelyn Wever Croes ta pretende cu AVP ta contra di introduccion di un cambio di ley pa castigo minimo den e casonan menciona, e ta lubida di bisa cu for di 2011 su persona a entrega su iniciativa pa cambio di e ley pa loke ta castigo minimo y a manda esaki pa tanto Gobierno como e departamentonan cu tin cu atende cu esaki.

 

Pa hunga politica barata Wever Croes ta sigui insisti den su declaracionnan cu Gobierno a neglisha su proyecto di ley y cu ta traha contra di esaki, mientras cu ta bin sali na cla cu t’e propio Evelyn Wever Croes, no kier perde tempo mas cu su iniciativa di ley, ya cu e tin tur cos den su poder pa presenta esaki na Parlamento.

El a acusa Minister di Husticia di falta di seriedad y Gobierno di AVP tambe, pero for di 4 di januari di 2012, un carta a ser manda pa Evelyn Wever Croes den su calidad di legislador caminda tanto Directie Wetgeving en Juridische Zaken como Minister di Husticia, a manda nan pensamento riba su iniciativa di ley.

 

Den e carta cu a cumpli 5 aña di existencia, ta mustra riba diferente punto, e.o. aspectonan cu e lider di MEP mester tuma na consideracion y tambe pa a duna mas aclaracion tras di su intencion p’e cambio di ley aki.

A manda pidi Evelyn shete punto pa su persona aclaria su motivacion y con e lo mira cu e cambionan aki lo atende diferente aspecto di e ley y kico esaki lo logra cu su implementacion.

Cinco aña pasa e carta aki a bay pa e lider di MEP y nunca el a reacciona ya cu fraccion di MEP ta kere cu contenido di e carta aki tabata nifica cu Evelyn lo mester a bin trabou y traha riba dje, loke ta algo sumamente dificil den ultimo añanan p’e haci como lider politico.

 

E carta pa colmo ta firma pa Minister di Husticia y a drenta Parlamento dia 4 di januari di 2012 y cinco aña despues e lider di MEP kier hunga wega politica barata cu su ley di iniciativa, pero no kier papia e berdad cu pueblo, bisando pueblo cu e ta interesa pa traha pa sirbi interes general di nos pueblo.

Mescos cu tabata e asunto di e caso di publicacion di Irus Crius caminda a ser mustra cu su persona ta ricibi suma grandi di placa y nunca el a bin Parlamento pa aclaria e asunto aki, awor un biaha mas Evelyn ta insisti pa baila pueblo y pretende cu no ta su persona a faya pero documentonan di Parlamento ta papia e berdad.

 

 

 

 

Top