AVP ta bin cu por lo menos 7 candidato nobo

Aruba ta den pleno campaña, cu a cuminsa tempran caba. Tur partido no solamente ta concentra riba bishita na cas, pero ta trahando tambe riba e lista cu ta bay presenta dia 4 di augustus proximo na Conseho Electoral y cual lo participa den e eleccion di 22 di september awor.

 

Si tuma e lista di AVP cu cual el a participa den e eleccion di september, 2013, tin 7 candidato cu a renuncia of cu no ta sigur si nan kier bolbe subi lista mas, aunke nan ta keda cu lasonan cu e partido.

Ta papia aki di Otmar Oduber (4008); Michelle Hooyboer Winklaar (1185); Juan David Yrausquin (1314); Deyanira Janssen Frank (75); Malayka Bufalini Rasmijn (113); Allan Howell (422); Marisol Lopez Tromp (1642).

 

Di e grupo aki esnan cu sigur no ta bolbe ta Otmar Oduber, Michelle Hooyboer (retira di politica); Allan Howell (a bay partido POR) y Marisol Lopez Tromp (a bay partido (POR).

Tanto di Deyanira Janssen Frank como Malayka Bufalini no a tende mucho di nan despues di eleccion.

Aunke cu ambos ta bin di famianan hopi AVP cu semper tabatin un laso estrecho cu e partido berde.

Den e caso di Juan David Yrausquin, el a renuncia na inicio di e actual gobernacion, mientrastanto a bolbe y ta ocupa e funcion di Minister Plenipotenciario.

Den pueblo di Noord ta wordo hopi papia cu e lo tin interes pa subi lista atrobe, pero p’esaki lo mester warda un poco pa haya confirmacion.

 

E candidatura di Yrausquin lo ta hopi necesario p’e partido berde den un eventual salida di Paul Croes. Bou di e simpatisantenan di Paul Croes mes ta existi un optimismo grandi, esta cu no tin nada cu por prueba cu e mandatario personalmente a pidi y tuma placa pa fabornan haci.

Ademas sin cu ainda Paul Croes ser haya culpabel, tin varios amigo cu ta kere cu Paul Croes mester ta riba lista di AVP, pa participa den proximo eleccion.

Tanten cu no tin nada concreto, Paul Croes ta wordo demanda pa ta riba lista di AVP, a menos cu dirigencia di AVP mes no kier’e.

 

Ademas di esey no tin confirmacion di Tyson Lopez (173) su participacion den e proximo eleccion, aunke cu por a compronde for di circula cu e ta interesa pa sigui den politica.

Tanto Clarisca Velasquez como Desiree de Sousa Croes, kendenan a expresa di lo retira, a haya hopi apoyo pa nan sigui activo den e partido berde.

Otro dos candidato cu no a haya informacion si nan ta interesa pa keda ta Richard Dirksz, kende den su prome salida a haya 218 voto y John van der Biezen (198), kende a bay Cuerpo Policial bek.

 

Mientrastanto ya caba tin algun candidato nobo di e partido berde cu ta conoci: Clayton Croes (Director di GKMB); mr. Gerlien Croes (sobrina di Duque Croes), kende a wordo anuncia diabierne anochi.

Otro candidato menciona ta Carlos Bermudes (Polis) y otro nombernan cu a wordo menciona ta: Cheito Croes, Philipe LaReine, Maurits Malmberg, y Xena Profet.

Fuera di esey, segun por a compronde ta den evaluacion cu Conseho di Partido si ta inclui riba e lista un di e tres ex candidatonan di MEP cu a uni nan mes den e campaña di AVP: Carl Giel; Gerrit Croes y Arondino Croes.

 

E eleccion aki ta bay bira un reto grandi p’e partido berde cu no solamente mester haci un renobacion grandi, pero tambe trata di gara bek mas tanto posibel di e 8759 votonan di e candidatonan cu sea a retira di politica of a renuncia di e partido.

 

Leave a Reply

Top