AWEMainta a perde un colaborador den persona di Mai Mateo

Nos tin hopi dia no ta mir’e, pero no por a pensa cu e tabata asina malo, te cu el a fayece. Pesey su morto a bin como un sorpresa pa nos tur na AWEMainta.
Mai Mateo, ta un colaborador di AWEMainta y asina di varios otro medio di comunicacion y kende semper a percura ora cu un deportista grandi, bay for di e mundo aki, Mai Mateo, kende no sa core auto, ta sea yama nos, of ta busca un amigo p’e bin oficina cu su albumnan di foto.

Y asina hunto ta traha un In Memoriam di e deportista cu a fayece. Pesey awe ta turno pa nos dedica sikiera un relato na nos colaborador Mai Mateo. E mes for di edad hopi jong a cuminsa hunga futbol, pa e.o. Hollandia, y asina a bira hunga pa Aruba Jrs. y RCA. Y na final di su carera futbolistico a yuda Riverplate como team di bario.

Mai Mateo, ta sali for di su cas, y na pida ta yega tereno di wega. E tabata un futbolista no solamente formando parti di oncena local, pero tambe a yega di representa Antiyas su seleccion di futbol.
Pesey ora di papia di futbol, Mai Mateo tabata un conoceder y kende a conoce esnan cu a yega di forma parti di e.o. seleccion di Aruba y di Antiyas.

Nos sigur lo haya su falta. Na su famia, ta bay nos mas sincero condolencia y cu Mai sosega den braza di Todopoderoso.

Top