Minister Dr. Alex Schwengle a firma acuerdo entre AZV y dunadonan di servicio: Awor lo maneha cuido mental den forma integral

 

Na e oficina principal di AZV a tuma luga diabierna ultimo e firma di un asina yama “Intentie Verklaring” relaciona cu Cuido Mental.

Minister di Salud Publico y Deporte, Dr. Alex Schwengle tabata presente na AZV y el a indica cu e prome documentonan ta papia di reorganisa y hiba un maneho integral den cuido mental na Aruba. Esaki ta data di añanan 70 caba y nunca a logra.

 

E mandatario ta contento cu awor a yega asina leu cu tur instancia ta mira e necesidad grandi di maneha cuido mental na un manera mas integral. Pa esaki a yega na un acuerdo cu AZV hunto cu tur instancia envolvi den cuido mental. A lanta un fundacion caba “Stichting Geestelijke Gezondheidszorg” y esey formalisa awo.

 

Diabierna a firma un acuerdo cu tur partido envolvi dunando apoyo na e idea aki y cu ta bay cuminsa ehecut’e tambe, Minister Schwengle a remarca.

Tin un “projectdossier” cu ta crece cu tempo. E enfoke pa cuido mental ta riba ambulante zorg (cuido ambulatorio). Ta bay tin dos ekipo di 8 profesional, un na Oranjestad y otro na San Nicolas. Cu tempo lo evalua si mester bin cu mas. Kisas un pa cada districto, e mandatario a indica.

 

Cu tempo lo envolvi PAAZ tambe, siendo e instancia cu ta brinda cuido clinico, lo hink’e den e maneho di e fundacion y verslavingszorg tambe lo bin bao di e mesun fundacion aki.

E placa tambe lo bay mas central, Minister Schwengle a remarca.

 

“Mi ta masha entusiasma y hopi contento cu porfin nos por a mara y yega na un decision cual direccion nos kier tuma y awe esaki ta djis e comienso”, Dr. Alex Schwengle a expresa.

Lo dura añanan pa yega na e nivel cu nos kier, pero esaki ta e miho manera pa hacie y specialmente dor cu e industria ta para su tras tambe, e mandatario a finalisa bisando.

Top