Ayera a despidi di Basilio “Barnol” Maduro di ATCO, kende a bay sosega Un di e pioneronan cu mas di 50 aña di lealtad y dedicacion

“El a cuminsa cu e compania prome cu mi na 1955 y despues cu el a bay cu pensioen na aña 2001 el a sigui traha te algun siman pasa cumpliendo mas cu 60 aña den servicio di compania”, asina Eduardo de Veer ta corda.

Ayera dialuna su famia, su amigonan y su ex coleganan di ATCO Concrete Products ta despidi di Basilio Maduro, conoci bou su amigonan tambe como “Noshi” of “Barnol”.

 

Gerencia di e compania ta corda ainda con Basilio a cuminsa su carera na ATCO como un “forklift operator”, cual ofishi el a eherce te cu 10 aña pasa mas o menos, ora cu el a baha cu pensioen.

Den su carera el a traha algun aña tambe como “Doorman” na De Veer Theatre, banda di su trabou na ATCO.

“Barnol tabata un empleado cu no mester di supervision, sino solamente direccion”, asina Wendell Bennett, un di e otro pioneronan den e compania y awendia miembro di e ekipo di MetaCorp a duna di conoce.

“E no conoce AO, vakantie ta nos mes mester a planea pe y fors’e p’e tum’e”, tabata entre locual Bennett ta corda di e defunto.

 

Na aña 2001 Barnol a baha cu pensioen, pero a regresa y a dedica tempo na preparacion di e splitblocknan algun dia pa siman, operando e mashin cu ta semiautomatico.

“A purba laga dos hoben haci e trabou, pero e realidad ta cu nunca nan dos hunto tog no a logra produci mes tanto bloki cu Barnol”, di acuerdo cu Wendell Bennett.

Barnol a sigui traha te recien ainda cu ATCO Concrete Products.

Pues no obstante cu el a baha cu pensioen, tog te cu algun siman atras ainda e tabata traha cu e compania. El a lucha cu un enfermedad, cu na final a gana e bataya.

 

“Mi ta consider’e un empleado ehemplar. Mainta tempran despues di mi landamento na Savaneta mi ta top’e regularmente canando for di su cas na Simeon Antonio pa ATCO na Barcadera  y nos ta crusa e saludo di semper….ayera mi a salud’e pa ultimo biaha ora nos a despedi di dje na ATCO”, asina Eduardo de Veer a termina bisando.

 

MetaCorp a inicia desde aña 1920 den negoshi di cine. Cu apertura di Lago a cuminsa cu E. de Veer Transport cu awendia yama ATCO cu despues a expande tambe den ATCO Concrete Products y Ecotech.

Top