Ayera mainta pa apertura di Aña Parlamentario – Gobernador Alfonso Boekhoudt ta efectua su prome apertura

Constitucion di Aruba ta stipula cu e apertura di e aña nobo di Parlamento di Aruba ta tuma lugar ayera. Democracia ta asigna un rol unico, central y crucial na Parlamento di Aruba den gobernacion di nos pais.

Ayera mainta Alfonso Boekhoudt tabatin e honor di efectua pa prome bes como Gobernador di Aruba, e apertura di e Aña Parlamentario 2017-2018.

Un aña parlamentario cu ta coincidi cu un contienda electoral aki 10 dia.

 

Tur ciudadano cu derecho di voto lo por eherce esaki den forma liber, pa eligi un Parlamento nobo, cu na su turno lo apunta e miembronan di Gobierno di Aruba, p’e proximo 4 añanan. Sin duda esaki ta duna e Aña Parlamentario aki un toke special.

 

Gobernador Boekhoudt no por keda sin corda riba nos rumannan di Islanan Ariba cu a wordo azota horiblemente pa horcan Irma cu forzanan feros destruyendo casnan, bidanan y tambe soñonan di hopi. Hechonan asina ta pone nos para keto riba nos vulnerabilidad como islanan chikito y e consecuencianan di cambio climatico pa nos. Pareu cu e forza destructivo a surgi un forza genuino di hermandad y convivencia. Irespecto di e distancia ayudo a y ta sali di tur skina di nos Reino pa brinda sosten y asistencia n’e damnificadonan.

 

Continuando, Gobernador Boekhoudt a bisa cu den un democracia bibo manera di nos, e maneho y escogencianan di Gobierno y Parlamento, ta wordo caracterisa p’e forma cu e ta refleha e necesidad y anhelo, oportunidad y idealnan cu ta biba den pueblo.

E cambionan grandi y desaroyo acelera di Aruba den e ultimo decada ta haci cu Gobierno y Parlamento mester balansa awor mas y den forma mas concreto, e crecemento economico di nos pais, cu e cuido di medio ambiente y e deseo pa mehoracion social cu ta biba den comunidad.

 

E balansa aki ta forma e base di un desaroyo sostenibel. Cu e fin aki, Nacionan Uni a defini 17 meta p’asina garantisa un desaroyo duradero y un prosperidad comparti. Gobierno di Aruba a compromete su mes completamente na realisacion di e metanan di Desaroyo Sostenible aki na Aruba.

Top