AZB orguyoso di su atletanan nomina durante e anochi di “Premio Excelencia den Deporte”

 

Pa medio di esaki Arubaanse Zwembond ta expresa nan orguyo pa cu tur e nominadonan pa Premio Excelencia den Deporte 2016, tur cual a gana e nominacion bon mereci!

E dedicacion y disciplina, como tambe e comportacion ehemplar como role model pa tur e atletanan cu ta practica e deporte di landamento na Aruba, di e forma aki a ser debidamente premia pa esnan nomina!

 

Un pabien en especial pa nos atleta Patrick Groters, cu a logra conkista e premio maximo di Atleta di Aña den categoria Masculino 15 – 17! Pabien!

 

Nominadonan den e disciplina di Landamento tabata:

Amy Pichardo (Categoria Femenino te cu 13 aña) – Jaydon Croes (Categoria Masculino te cu 13 aña) – Elisabeth Timmer (Categoria Femenino 14 – 17) – Patrick Groters (Categoria Masculino 14-17) – Allyson Ponson (Categoria Atleta di Aña Internacional 18 & up).

 

Nominadonan den e disciplina di Synchro tabata:

Avigail Tromp (Categoria Femenino te cu 13 aña) – Abigail de Veer (Categoria Femenino 14 – 17) – Kyra Hoevertsz (Categoria Atleta di Anja Internacional 18 & up).

Honradonan Special pa clasificacion y participacion na Weganan Olimpico Rio 2016:

Allyson Ponson y Mikel Schreuders.

 

Proximamente e delegacion di landamento lo biaha pa Cali, Colombia,unda lo participa den e Campeonato di Consanat Sud Americano Hubenil. E atletanan cu lo participa ta Flory Kock, Elisabeth Timmer, Keeley Maduro, Anahi Schreuders, Daniel Jacobs y Brandon Cheong.

Den e campeonato di Carifta na Bahamas, Aruba lo ta participando cu solamente un landador, esta Patrick Groters.

 

E delegacion di synchro, consistiendo di Abigail de Veer y Neftaly Albertsz lo ta participando na US Nationals cual lo tuma lugar na Tucson, Arizona.

AZB ta desea tur nan atletanan hopi exito den nan competencianan den exterior.

Top