Balashi Premuim ta derota Spuiters cu un knockout y Spuiters ta reaciona cu un victoria

Campeonato Heinken di ASB dedica na dos baluarte sra. Bertha Wolf Croes y Eugenio “Tan” Helder a continua riba veld di Dragon Hitters na Baracadera. Den categoría AA masculino e tremendo campeonato oficial di Aruba Softball Bond a sacudi veld di Dragon Hitters cu dos tremendo partido.

Balashi Premuim cu nan pitcher estrea creciendo, esta Jean Carlo Gomez a domina e equipo di Spuiters por completo silenciando nan bate na solamente 2 hit pa knock out e fuerte equipo di Spuiters cu score di 11-1.

Balashi Premuim 11 careda, 11 hit, 0 eror. Spuiters 1 careda, 2 hit, 3 eror. Henk Arnold himself ta bay cas cu e derota recibiendo relevo di Gilward Wester den di 5 inning, kende a wordo releva pa Angelo Arnold den di 6 inning.

Mihor bateadornan pa Balashi Premuim ta Filbert Thiel 4-3, Djurwin Croes y Marc Danies di 4-2, Sando Geerman di 3-2, Josmar Thiel di 2-1.

Pa Spuiters e único dos imparabelnan a wordo bati pa Deon Peterson y Gilward Wester, kendenan a bay di 2-1.

 

Spuiters sinenbargo manera e canción di e famoso artista Luis Fonsi: “No me doy por vencido” ta reaciona den di dos wega y ta logra kita un wega di Balashi Premuim ganando esaki 7-3 tras di un tremendo actuación di Angelo Arnold cu a bay henter e wega. Jorge Sanatana di Balashi Premuim ta resulta pitcher perdedor.

Spuiters 7 careda, 7 hit, 3 eror. Balashi Premuim 3 careda, 7 hit, 2 eror. Mihor bateadornan pa Spuiters ta Deyon Peterson 4-2, Gerson Croes 2-1, Gilward Wester, Walfrido Wester y Arsan Wester tur a bay di 3-1.

Pa Balashi Premuim a destaca na plato Marc Danies 3-3, Ayrton Falcon 2-1, Filbert Thiel 3-2, Egimar lampe di 3-1.

Weganan di campeonato oficial di Aruba Softball Bond ta continua henter siman benidero. Pues campeonato ta den pleno rotación cu mas di 10 wega den e siman aki. Softball @ “full forcé”.

Leave a Reply

Top