Baluartenan den deporte Arubano a haya nan merecido reconocement

Durante Premio Excelencia den Deporte 2016 tambe a reconoce nos baluartenan. E personanan aki den pasado t’esnan cu a habri caminda pa deporte cu nan a eherce.
Pa hopi aña e baluartenan aki a sea presta y/of traha den forma incansabel pa nan deporte, sobresali den esaki, mientras e mayoria kizas hasta a fungi como un di e caranan di e deporte Arubano.
P’e motibo aki tambe Comision Premio Excelencia den Deporte a honra cada uno cu un reconocimento cu sin duda ta na su lugar.

E baluartenan cu a haya nan merecido reconocimento den e Premio Excelencia den Deporte ta Richard Simon, Jossy Tromp, Chu Halabi, Freddis Refunjol, Roly Bisslik, Nadeis Reyes, Ramon Buckley, Lola Vrolijk, Harry Croes y Fenchi Dubero.
Na banda cu a honra nos baluartenan nos scolnan basico y avansa tambe a forma parti di e magno evento aki ya pa e di dos aña.

Ta bon pa menciona cu e departamento gubernamental encarga cu deporte, esta IBiSA t’esnan cu a eligi e ganadornan segun criteria y prestacion.
E dos scolnan ganador a bira Prinses Amalia pa scol basico y Colegio Arubano Oranjestad pa scol avansa.
Como e MVP nan scol basico a bira Julymar Croes di Cacique Macuarima School y Jan Pollak di Scol Basico Washington. Como e MVP scol avansa a bira Lizanne Kelly di Colegio Arubano Oranjestad y Diquion Ras di Maria College Mavo.

Mester bisa cu e organisacion di Special Olympics Aruba ya pa algun aña caba tambe ta forma parti di e evento Premio Excelencia den Deporte.
E organisacion mes ta eligi nan atletanan cu a presta den gran forma e aña deportivo 2016. E mihor atletanan di Special Olympics cu a haya reconocimento ta Andre Geerman y Jolanda Perez.

Por ultimo a otorga un medaya na e atleta Paralimpico Jesus David De Marchena esaki na Community Pool na San Nicolas. E atleta di landamento Jesus David a representa Aruba den e Weganan Paralimpico di Rio 2016.

Un pabien grandi na tur e ganadornan

Top