Ban celebra democracia haciendo uzo di nos responsabilidad cívico – Partido POR ta haci un yamada pa celebra democracia cu orguyo y respect

Durante un conferencia di prensa, den cual a presenta 6 candidato nobo cu ta uni nan mes n’e plataforma E Forsa Nobo, lider di partido, sr. Otmar Oduber, a enfoca specificamente rib’e aspecto comunitario cu ta un di  e 4 balornan riba cual e vision di partido POR ta ancra.

 

Refiriendo na e evento di entregamento di lista diabierna awor, sr. Oduber a elogia e hecho cu na Aruba nos conoce un tradicion di por celebra nos derecho di democracia na un manera liber y habri. Un aspecto cu den e temponan aki sigur, mirando e situacion na un pais hopi cercano manera Venezuela, ta algo cu nos mester balora y respeta.

Enfatisando con bendiciona nos isla ta di por celebra libremente e derecho democratico aki sr. Oduber a haci un yamada specifico na e sostenedonan di partido POR pero tambe na cada un ciudadano riba nos pais, pa eherce nan responsabilidad civico na un manera respetuoso y responsabel, unda ta mustra respet pa cada un nan creencia y sosten politico.

 

Sr. Oduber a elogia e institutonan sumamente importante den e proceso democratico, esta Conseho Supremo Electoral, Cuerpo Policial y Censo. E institutonan ta percura pa nos como cuidadano por eherce nos derecho democratico, saliendo for di un tradicion largo cu nos pueblo conoce di semper a boga pa su autodeterminacion.

Nan tin e tarea sumamente grandi den e dianan aki pa salvaguardia no solamente nos derecho democratico, pero den caso di Cuerpo Policial, tambe garantisa nos seguridad pa por eherce esaki debidamente. Nan merece nos sosten maximo pa por eherce nan tarea como debe ser.

 

E lider di partido ta pidi pa laga cada ken ta liber pa por demostra su sosten politico sin cu esaki yega na destruccion di propiedad of otro impedimento di e tradicion di libertad di expresion cu nos conoce. E ta haci esaki saliendo for di un di e pilarnan riba cual partido POR ta basa su vision, esta e balor comunitario. Enfatisando asina e laso estrecho cu e partido ta boga pa tin cu e ciudadano, cada un ciudadano riba nos pais, cu kier celebra democracia na un manera habri, orguyoso y cu respet pa cada un cu ta comparti e pida baranca aki, como tambe n’e institutonan cu ta haci esaki posibel.

Top