Banco Central di Aruba ta organisa Isla Innovativo y Regathon

 

No ta un secreto cu tin un revolucion tecnologico andando. Sistemanan digital ta cambiando nos manera di traha y biba. Pensa riba tur locual bo por haci riba bo smart phone awendia y lo bo ripara cu inovacion digital ya ta parti integral di nos economia.

Investigacion ta mustra cu digitalisacion na Aruba ta den su di tres ‘ola di inovacion’, unda nos por wak cu internet, social media y smart phone a alcansa un nivel di uso halto.

 

Di otro banda, inovacion den comercio electronico y pagonan digital ta menos avansa.

Riba su mes inovacion digital no ta nobo, sino cu digitalisacion ta desaroyando mas liher den ultimo tres pa cinco aña, influencia tambe dor di un demanda y generacion nobo di consumidor y empresario.

Den e cuadro aki, digitalisacion tin su efecto riba nos desaroyo economico. Pa mantene un cierto nivel di stabilidad y competencia den un contexto dinamico, comercio y economia mester adapta y innova di forma agil.

 

PARTICIPA DEN ENCUESTA NACIONAL

Pa por desaroya un bista mas completo y profundo di inovacion digital y stimula digitalisacion, Banco Central di Aruba (BCA) ta organisa un encuesta nacional dirigi na ehecutivonan, directiva, empresario y lidernan den diferente sector priva y publico.

E meta principal ta pa mehora y desaroya nos potencial den inovacion digital.

E encuesta ta online (www.cbaruba.org) y ta inclui seis (6) tema: Comercio & competencia; inovacion & tecnologia; mercado laboral & capacidad; servicio financiero; Gobierno & governance; empresario & colaboracion.

Pa participa den e encuesta, por bay online riba website di BCA, unda lo haya e link directo (www.cbaruba.org). Tambe lo por simplemente scan e QR code cu bo smart phone, p’asina contesta e preguntanan.

E resultadonan lo keda presenta durante e conferencia anual di BCA na luna di november.

 

 

CONFERENCIA DI REGTECH

Durante e conferencia anual di BCA, diferente orador internacional y local lo elabora riba inovacion digital y e impacto riba nos desaroyo financiero-economico.

Digitalisacion ta crea oportunidad y reto nobo pa institucionnan financiero, especialmente relata na diseño di servicionan digital di calidad (‘digital experience’) y capacidad analitico (‘artificial intelligence’).

Na mesun tempo, e institucionnan aki mester inverti den inovacion y seguridad digital (‘cyber security’), y tene nan mes na regulacion y normanan di supervision y integridad nobo.

 

Den e ultimo area aki di regulacion, nos ta observa tambe desaroyo den tecnologianan di regulacion (‘RegTech’). ‘RegTech’ ta un area relativamente nobo cu ta focus riba inovacion y digitalisacion di regulacion, unda diferente proceso di supervision y riesgo ta wordo agilisa cu tecnologianan avansa manera artificial intelligence, Internet of Things y Block Chain.

Regathon: Hackathon di RegTech

 

Tambe BCA lo organisa un hackathon riba e tema di RegTech, p’asina bin cu solucion digital y creativo pa fortalece inovacion den regulacion.

Durante e Regathon aki, cu lo cuminsa durante conferencia di ATECH, diferente teams (di 3-5 persona) lo por competi pa un periodo di 12 ora riba diasabra 28 di october proximo, cuminsando pa 9:00 or di mainta na Hilton Hotel. Teamnan por scoge un area specifico y lo tin coaching.

 

 

Na final, despues di 12 ora di hack, lo mester presenta e solucion/diseño digital. Un panel di experto lo evalua kende lo gana e premio final. Durante e conferencia anual di BCA lo anuncia e ganadornan di e hackathon.

Pa mas informacion y pa participa na e Regathon, por download e documento ‘Regathon Competition’ riba website di BCA (www.cbaruba.org) y manda un e-mail pa arubafintech@cbaruba.org prome cu diabierna 20 di october  2017 pa 2:00 or di atardi.

 

 

Leave a Reply

Top