Barionan na Aruba bibando bao di riesgo pa nan salud; kico a pasa cu e ley di medio ambiente?

No ta di awor, pero ta for di basta aña habitantenan di Parkietenbos ta busca un solucion p’e situacion cu tin na dump.

E bario di Simeon Amtonio a sclama pa ayudo y varios trabao a keda haci dor di e habitantenan mes. Tambe a colecta firma p’asina hala atencion di Parlamento y Gobierno riba e situacion cu e bario ta bibando aden,

Sinembargo nos por mira cu nada no a sosode, asina sra. Robin-Ann Didder di POR a duna di conoce.

 

Awe un biaha mas nos por a tuma nota di un otro bario cu ta sclama pa atencion debi cu tin un dump mey-mey di terenonan habita.

Kico  t’e maneho y vision di Gobierno aki? Partido POR di e Plataforma e Forsa Nobo tin henter e situacion na bista y kier atende cu e punto aki primordialmente.

Loke ta importante pa pueblo sa, kico t’e efecto cu e situacion aki por causa pa un ser humano.

 

Di acuerdo cu Robin-Ann Didder, kende ta un Chemisch Analist, ta analisando e situacion aki for di basta tempo y tambe a tuma nota di e efecto no positivo cu esaki por ta pa un ser humano cu ta hala rosea den un aire contamina.

E substancia cu ta keda tras den un palo kima ta: 1. Stof fini di e palo, e shinishi cu ta forma un mineral fini: 2. E shinishi fini por bula y causa polucion: 3. Tin un holo of fragancia. 4. Ta forma un ”link” di gas. 5. Substancia toxico acetaldehido e.o ethanol. 6. Zuur; cu ta un acido formico, y un gas cu ta yama propaanzuur. 7. Compuestonan aromatico condensa ect.

 

Fuera di carbon, hidrogeno, y oxigeno palo tambe tin nitrogeno (oxido nitrico), potassium, asufre y elementonan manera arsenico, cadmium, chromo, koper, kwik lood y zink.

Segun Robin-Ann Didder, e metalnan aki ta cay bao di metalnan pisa y venenoso. Ora ta kima un palo tur e substancianan aki cu ta sali  por causa daño na salud, medio ambiente, y e molester cu e por causa cu esaki.

Tur e stofnan fini ta daño potencial na salud y medio ambiente.

E componente di holor no directamente por haci daño, pero si por conduci na duna molester debi n’e holor stinki.

 

Kehonan por bin mas tanto di e holor stinki di e huma di palo cu por asocia psychologicamente riba anshamento.

E stof fini cu ta sali no necesariamente por ta fuerte ni tampoco e huma, pero e holor so ta un menasa pa salud publico.

Na momento cu un ser humano ta hala aire cu ta contamina esaki por causa malesa di pulmon, entre otro COPD aunke cu humamento di sigaria t’e principal causa di COPD, pero tambe tin otro factornan cu por causa e malesa aki cu na Aruba AZV no ta dunando speransa n’e pacientenan pa biba mas largo.

 

Segun e politico di POR, actualmente tin mas cu 44 persona cu e malesa di COPD cu ta keda causa dor di humamento secundario; polucion di aire; stof of vapor na pia di trabou; exposicion na biomass (kimamento di palo), ta aspectonan cu por conduci na COPD.

Un problema genetico no comun yama “α 1 – Antitrypsin Deficiency” tin biaha ta wordo asocia cu COPD tambe.

Mirando esaki Robin-Ann Didder ta puntra su mes si Gobierno di Aruba tin e situacion cu nos pueblo ta biba aden na pecho.

Gobierno no ta percura pa Aruba tin un aire cu ta adecua pa cada un di nos por hala rosea limpi y alabes tampoco ta duna e posibilidad di haya tratamento pa por biba mas largo, na momento cu e malesa cu e ciudadano a haya ta causa dor di e mes un aire contamina cu Gobierno no ta percura pa tin un structura y ley pa actua na dje.

 

Partido POR di Plataforma e Forsa Nobo tin e situacion aki na pecho y lo atende cu e situacion aki hopi na serio, paso cada ciudadno aki na Aruba ta importante pa nos den partido POR, Robin-Ann Didder a conclui.

Top