Bautismo di uniform “Brazil Dental Care/Lucor”

Recientemente e ekipo di baseball Liga 40+, esta “Brazil Dental Care/Lucor” a celebra e bautismo di nan uniform nobo pa campeonato 2017.
Den presencia di e sponsornan dr. Guido Wever (Brazil Dental Care), sra. Ludwina Vis y sr. Bituel Vis (Lucor Jewelers) y sr. Ravee Boolchand (Boolchand’s Aruba) e hungadornan y demas famia a celebra e bautismo di nan uniform pa campeonato 2017 di Aruba Baseball Clasico Liga 40+.

E bautismo a wordo haci p’e madrinanan srta. Indi Wever, yiu di e sponsor principal dr. Guido Wever, hunto sra. Ludwina Vis di Lucor Jewelers.
Na 2016 a tuma lugar e prome campeonato di Liga 40+ y mester a constata cu den casi tur ekipo tabatin hungador cu den pasado a yega di hunga pa Brazil.

Despues di e campeonato 2016 a nace e idea pa forma un ekipo pa e cameonato 2017 di Liga 40+ cu ta consisti di hungadornan cu a yega di hunga di Brazil.

Asina pues a reuni hungadornan cu den pasado a yega di hunga riba nivel double A (AA)  pa sea Brazil Lucor, Brazil Shell Barlock, Brazil Coastal of Brazil Valero.
Despues cu e ekipo a keda forma a aserca algun sponsors y nan a mira e entusiasmo di ekipo y imediatamente a compromete nan mes pa duna un aporte financiero na e ekipo.
E sponsor principal a bira Brazil Dental Care cu t’e consultorio di dr. Guido Wever. Cu hopi orguyo tambe a haya compromiso di un di prome sponsornan di Brazil, esta  Lucor Jewelers, pa duna e ekipo di Liga 40+ un aporte financiero.

 

Pa duna honor n’e sponsor aki a keda dicidi cu lo inclui e nomber di Lucor den e nomber oficial di ekipo y p’e motibo aki e nomber oficial bao cual ta participa den e campeonato 2017 ta “Brazil Dental Care/Lucor”.

E di tres sponsor cu a mustra un interes y entusiasmo pa aporta n’e ekipo ta Boolchand’s Aruba.

Den nomber di tur hungador y lidernan di ekipo ta bay un gradicimento inmenso na cada sponsor. Brazil Dental Care/Lucor ta compromete su mes pa carga nomber di cada sponsor cu orguyo durante campeonato 2017.
Campeonato di Liga 40+ ta tuma lugar riba tur diasabra riba tereno di Nadi Croes/Crismo Angela na Sta. Cruz y partidonan ta cuminsa 1 or y 3.30 di merdia.

Un y tur ta keda cordialmente invita (entrada ta gratis) pa bin apoya e peloteronan clasico cu a hunga baseball Double-A den pasado.

Top